Por unha declaración institucional no Concello de Ourense en apoio ás mulleres doentes de endometriose
6 Novembro, 2018
1
•   Ourense é a única das sete grandes capitais galegas que non comprometeu o seu apoio a este colectivo.
•   A petición faise eco dunha moción promovida pola Asociación querENDO, que xa foi aprobada tamén nas catro deputacións galegas e en varios concellos da provincia, como Barbadás, Xinzo ou Ribadavia.
•   Un 10% das mulleres en idade fértil padecen “unha epidemia real, pero oculta e desatendida polo sistema sanitario, que pode implicar un grave problema de infertilidade”.

    Ourense en Común rexistraba hoxe un escrito dirixido ao alcalde, solicitando que se leve ao pleno unha declaración institucional en apoio ás mulleres doentes de endometriose, para o que instan ao goberno a convocar unha xunta de voceiros e consensuar entre todos os grupos da corporación un manifesto en solidariedade coas que padecen esta enfermidade, reclamando maior e mellor atención ás súas necesidades, e contribuíndo á visibilización desta doenza.

    A petición faise eco dunha moción proposta pola Asociación querENDO. Mulleres con Endometriose, rexistrada a finais do mes de agosto dirixíndose a todos os grupos no Concello, pero da que “soubemos dela hai uns días, cando a propia asociación nola remitiu por correo electrónico e nos informou da situación. O goberno traspapelouna ou agochouna, nunca nola fixo chegar”.

    A proposta foi xa aprobada polos grandes concellos de Galicia, “só falta Ourense. A Coruña, Lugo, Pontevedra, Ferrol, Santiago, e Vigo, as catro deputacións provinciais e varios concellos pequenos, entre eles Barbadás, Xinzo ou Ribadavia, xa manifestaron e comprometeron o seu apoio ás pacientes de endometriose.

    No grupo defenden que “temos que ir todos a unha con esta epidemia oculta”, e explican que o descoñecemento e a pouca atención que o sistema sanitario prestou ata o momento aos síntomas, provocan un grave retraso no diagnóstico da doenza, de ate máis de 8 anos. Moitas afectadas nin saben que teñen a enfermidade, a endometriose afecta ao 10% das mulleres en idade fértil, pode resultar incapacitante para a enferma e implica en moitos casos un grave problema de infertilidade. Conclúen que “o mínimo que podemos facer é solidarizarnos con esta loita, e dar resposta ás reivindicacións das doentes. As administracións somos quen, e debemos implicarnos na visibilización, garantir ás doentes atención e coidados, promover proxectos de investigación sobre a enfermidade, e impulsar campañas informativas nos centros educativos, para dar a coñecer a doenza, e tratar de recortar na medida do posible o retraso diagnóstico”.

Deixa unha resposta

1 comment

  1. Son unha das moitas mulleres afectadas por endometriose e con unha histerectomía total os 38 años despois de levar varios anos sufrindo dores bastante importantes sin que ningún médico me descubrise está enfermidade. Teño que decir que facía controis xinecolóxicos todos os anos.