Ourense en Común xa gañou

Ourense en Común xa gañou

Ourense en Común xa gañou. Por que? Porque non precisamos gobernar para levar a cabo o tan desexado e necesario cambio, nós xa comezamos a mudar o xeito de facer política. Como? Empuxando aos partidos políticos tradicionais, e mesmo tamén ao que se financiou ilegalmente, a sumarse ao carro da participación e da transparencia. Gañamos xerando na conciencia das ourensás e dos ourensáns a idea de que é posible ese cambio e de que todas e todos podemos axudar a desenvolvelo. Como dixo Eduardo Galeano “Moita xente pequena, en lugares pequenos, facendo cousas pequenas pode cambiar o mundo”.

Pero párense a pensar. Hai transparencia real nun partido que agora fai bandeira dela pero leva gobernando na Deputación de Ourense (por poñer un só exemplo), durante 28 anos, do xeito máis oscurantista que unha poida imaxinar? Hai participación directa nesta rancia institución na que unha estirpe manda en base ao clientelismo político? E no concello, de que xeito puidemos nós colaborar contra catro anos de desgoberno, con imputacións e insultos mensuais? Pero os tempos están obrigando a eses partidos e a esas institucións, que funcionan cunha estrutura xerárquica na que a única participación que se ofrece é a posibilidade de votar cada catro anos, a transformar o seu xeito de facer política. Pero unha cousa son as verbas e outra ben distinta, os feitos. Velaquí o feito por un Ourense do ben común: Programa colaborativo.

Por moito que tamén outras organizacións políticas presuman deses adxectivos tan de moda malia que marcharon dun proxecto porque non se sentían cómodos con esta nova maneira de traballar, Ourense en Común somos as únicas que contamos cun Programa Participativo Real, ambicioso pero realista. Estas propostas foron escoitadas na rúa, elaboradas nos barrios da cidade, en nove mesas sectoriais, man a man, xuntas. Aquí están recollidas as necesidades urxentes dunha cidade que non se pode permitir ter a 25 mil persoas en risco de pobreza (datos do IGE). Nós apostamos polo bo vivir, para todas e todos, non só para un fato de persoas, para as nosas fillas e fillos, netas e netos e para as que nos visitan. Respectando a cidade, porque o noso, ten moito valor só precisamos poñelo en valor. O progreso e o desenvolvemento económico poden ir da man co coidado do medio e son posibles sen esquecer nunca a xustiza social. O Ourense que soñamos e pretendemos é a cidade da xente.

[metaslider id=2145]
Ourense, Centro Cívico Colón. Martes, 4 de maio.

Esta foi a presentación do noso programa, o voso programa. Dende hoxe e ata o 22 de maio tentaremos debullalo para que poidades saber e comprender que é o que pretende Ourense en Común.

Na praza

Hoxe é un dia importante para a cidade de Ourense, arranca un proceso de transformación liderado pola cidadanía, por todas as persoas que estamos aquí e polas que se vaian unindo. Isto é un proceso aberto, participativo, de crecemento local. Isto é Ourense en Común.

Aberto e participativo, porque cabemos todas as que queiramos contribuír á gañar a cidade, dende abaixo, superando o nepotismo e os gobernos “por” e “para” uns poucos. Non podemos e non debemos seguir a senda da resignación ante o desgoberno, a corrupción e a impunidade de políticos que dirixen a cidade de costas á cidadanía. Hoxe queremos deixar claro que Ourense é Común, é de todas, por iso estamos aquí. Porque queremos democratizar as institucións e decidir que cidade queremos, temos moito que aportar para mudar o xeito de facer as cousas, somos axentes transformadores, sexamos conscientes disto e actuemos.

Aquí nace Ourense en Común, para integrar vontades de cambio, superando as diferenzas, para ser capaces de acadar a confluencia dende a confianza mutua, entre as persoas, entre os colectivos, só así poderemos gañar a cidade. Non será a victoria duns sobre os outros. Será a victoria de todas, a que Ourense necesita.

Cambiar a orde das cousas e do xeito de gobernar a cidade é un reto difícil e ambicioso, pero tamén ilusionante, precisamos de artellar mecanismos e instrumentos que permitan á cidadanía facer parte das decisións relevantes e intervir na política municipal. Queremos confluír coas iniciativas e movementos activos na cidade, para que, indo máis aló da suma de siglas, sexamos quen de construír un proxecto común.

En Ourense en Común hai amor por esta cidade e vontade e entusiasmo, e confianza na cidadanía para transformar a vida municipal, dende a equidade, a xustiza social e a participación democrática. Hai a fermosa convicción de que a confluencia é imprescindible se queremos gañar. Non gañar unhas eleccións se non gañar a cidade para as veciñas e veciños. En Ourense en común aprendemos facendo, colaborando, comunicando… Hai ideas, hai debate, pero sobre todo, hai persoas.

Aquí contamos todas, pero sobre todo conta o ben común.

Moitas Grazas e Benvidas!!

Presentación

Asinaches o manifesto de Ourense en Común? Tes pensado facelo? Pensáchelo pero aínda non te decidiches porque non gostas dos medios telemáticos? Queres saber máis sobre o que propón antes de apoialo? Hai un mundo de razóns para vernos o xoves 18 ás 20 horas na Praza Maior. Un espazo para confluír e construír, un espazo para participar.

Ourense en Común xa está aquí con 300 adhesións. É o momento de desenvolver a proposta, presentala publicamente, abrila á participación e amosar toda a súa potencia cun acto masivo.

Contamos contigo!