Solicitamos no pleno recursos para combater a pobreza no concello de Ourense

Solicitamos no pleno recursos para combater a pobreza no concello de Ourense

• Os indicadores da Rede Galega contra a Pobreza e Cáritas evidencian un aumento da pobreza en Ourense, especialmente acusado entre mulleres e persoas maiores de 65 anos.
• A precarización do mercado laboral non permite que ter traballo garanta saír dunha situación de exclusión social.
• O grupo sinala aos 70 millóns de aforros municipais para crear un Fondo de Protección Social co que combater esta situación.

    O pleno do Concello de Ourense debatirá este venres unha proposta do grupo municipal Ourense en Común que pretende fixar a atención da corporación nos altos índices de pobreza e exclusión social da localidade. Dende a organización municipalista apuntan que “o risco de pobreza e exclusión social é un dos problemas fundamentais que enfronta Ourense”, facéndose eco dos informes publicados durante os últimos anos por diversos organismos e, especialmente, os realizados pola EAPN (Rede Europea de Loita contra a Pobreza).

    Ourense en Común presentará no pleno os datos que demostran a gravidade da situación na cidade das Burgas e, botando man da Memoria de Cáritas, inciden en que “dende o ano 2008, o número de persoas no limiar da pobreza ou en risco de exclusión non para de medrar”, apuntando a que estamos nunha “situación de empobrecemento e precariedade normalizada, onde cada día máis familias en Ourense teñen dificultades para afrontar os pagos do alugueiro, a alimentación ou dos subministros básicos”.

    Martiño X. Vázquez, voceiro do grupo, defende que o Concello de Ourense “ten que achegarse a esta realidade e orientar as políticas públicas a reducir as cifras da pobreza, detrás das que se agochan persoas”. Dende Ourense en Común propoñen a creación dun Fondo de Protección Social, co obxectivo de “atender a todas persoas que o necesiten, ampliando e renovando as axudas se é preciso, e camiñar cara unha renda mínima municipal coa que soportar o drama da ausencia de ingresos ou a precariedade de cada vez máis persoas no noso concello”.

    No grupo urxen axilizar os trámites da xestión deste Fondo, “deixando avanzado o traballo para o próximo ciclo electoral, para que o noso goberno empece a ser fructífero desde o primeiro minuto en que entremos pola porta da alcaldía”.

No próximo pleno pediremos un compromiso de todos os partidos para loitar contra o desemprego

No próximo pleno pediremos un compromiso de todos os partidos para loitar contra o desemprego

• A taxa de paro rexistrada na capital sitúase na mesma porcentaxe que antes da crise, pero cunha caída no censo de 2500 persoas.
• No ano 2017 só un de cada 10 contratos eran fixos.
• A precariedade laboral e a emigración son as únicas políticas activas de emprego do Partido Popular.

    Na mañá deste venres,  Ourense en Común rexistraba unha iniciativa a defender no vindeiro pleno municipal do mes de abril, incluíndo un acordo co que se pretende comprometer a sinatura dun Pacto Local polo Emprego, conxuntamente entre as forzas políticas e entidades do tecido económico e social de Ourense, co fin de que a vindeira corporación poida garantir o desenvolvemento dunha estratexia de emprego para o Concello, que permita articular e optimizar os servizos e programas existentes, e outros de nova creación, incorporando tamén medidas para o emprego de colectivos específicos.

    Martiño Xosé Vázquez, voceiro e candidato á alcaldía por Ourense en Común, apuntaba esta mañá que a finalidade deste pacto é “blindar nos programas electorais de todas as forzas políticas un compromiso coa que é a maior preocupación da veciñanza de Ourense, especialmente da xente nova e mulleres”. Preténdese, en palabras do portavoz e candidato, “que, independentemente de quen goberne despois das eleccións, exista un preacordo de políticas activas de emprego”.

    “Namentres algúns se aferran ao mantra de que o emprego non é competencia municipal, nós sabemos que hai infinidade de accións que podemos levar a cabo desde o Concello para estimular a creación de emprego, impulsar o emprendemento, e reverter a grave situación de desemprego que viven miles de familias na nosa cidade, ben de forma directa, apostando pola cooperación público-privada, o apoio a iniciativas sociais de emprego, a sinatura de convenios, o fomento do cooperativismo, habilitando un servizo de mellora e reciclaxe profesional para a inserción de maiores de 45 anos, ou ben de forma indirecta, vía bonificación de impostos por exemplo. Ourense precisa un goberno activo, con vontade e compromiso co emprego, non pasivo á agarda de que outras institucións veñan a nos salvar”.

    Con esta moción o grupo continúa na liña que xa anunciara para as últimas sesións plenarias, buscando “deixar avanzado o traballo para o próximo ciclo electoral, para que o noso goberno empece a ser fructífero desde o primeiro minuto en que entremos pola porta da alcaldía”.

1.000 días de desgoberno en Ourense

1.000 días de desgoberno en Ourense

• Ourense en Común, co respaldo do Grupo Socialista, pide un pleno extraordinario para avaliar o estado da cidade.
• “Hai 1000 motivos para afirmar con total rotundidade que estamos perante o peor alcalde da historia de Ourense”.
• OUeC destaca a falta de orzamentos, o pelotazo urbanístico que o PP “está cociñando” co PXOM, e as concesións prorrogadas, coas que empresas implicadas en casos de corrupción seguen “forrándose” a costa das veciñas e veciños de Ourense.
• O alcalde perdeu mil días “cambiando de cor a Ponte Vella para as fotos, pero sen facer cidade”.

    O próximo sábado cumpriránse 1000 días desde que o Partido Popular, con Jesús Vázquez á fronte, entrara como goberno no Concello de Ourense;  un aniversario que Ourense en Común avalía como “mil días perdidos, de parálise total” e polo que solicitarán, co respaldo dos edís do grupo socialista no Concello, un pleno extraordinario sobre o estado da cidade, no que o alcalde e o seu equipo expliquen o motivo polo que “levan mil días sen facer cidade, pero facendo negocio”.

    Nunha rolda de prensa celebrada esta mañá, o voceiro do grupo, enumeraba as “responsabilidades sen acometer” do equipo, para concluír con rotundidade que “estamos perante o peor alcalde da historia de Ourense“.

    Ourense leva mil días sendo a única cidade galega sen orzamentos, sen Plan Xeral de Ordenación Municipal nin políticas de vivenda pero “tecendo un pelotazo urbanístico”, sen oferta pública de emprego pero con emprego para Javier Rodríguez Nóvoa, “enchufado para manter o caciquismo no Concello”, sen ordenanza de veladores nin de accesibilidade, sen unha sola peonalización nin acción estratéxica de humanización e pacificación do tráfico, sen solucionar o problema dos colectores soterrados, con talas indiscriminadas no arboredo, e un Montealegre convertido nun xardínnamentres os xardíns están convertidos en monte”, sen novos pregos para o transporte público, a ORA ou os semáforos, prorrogando “contratos con empresas como Vendex, implicada na Pokemon”, sen implementar nin unha soa acción do plan turístico redactado pola Universidade de Vigo –polo que se pagou 11.000€ “para telo gardado nun caixón-, etc…

    Martiño Xosé Vázquez facía ademais mención á edil responsable de “desgobernar” os Servizos Sociais na cidade, Sofía Godoy, incapacitada para o servizo público”, logo tachar ao feminismo de androfobia, suprimir o programa de conciliación familiar, e deixar de sen axudas escolares a 3 de cada 10 familias que tiñan acceso a elas.

    O pleno que OUeC e PSOE solicitan, terá que ser convocado nos próximos 15 días.

OUeC solicitará en pleno nomear unha praza “Pobre Asunción” como símbolo contra a violencia machista

OUeC solicitará en pleno nomear unha praza “Pobre Asunción” como símbolo contra a violencia machista

  • Asunción González, asasinada o 28 de abril de 1891, foi a primeira vítima por violencia machista declarada e documentada en Ourense.
  • Ourense en Común proporá no pleno do mes de abril nomear unha praza co nome co que foi recordada (Pobre Asunción) como símbolo contra os asasinatos machistas e en recoñecemento a todas as mulleres historicamente sometidas a violencia patriarcal.
  • A iniciativa presentada por Ourense en Común pretende abrir á participación co obxectivo de recoller máis propostas de mulleres relevantes para todas as prazas sen nome propio no municipio (Praza 100, 200, 500 ou 1000).

 

Ourense, 8 de marzo de 2017

Ourense en Común presentará no próximo pleno ordinario do mes de abril unha iniciativa coa que se pretende nomear unha praza Pobre Asunción, o nome co que pasou a historia Asunción González, a primeira vítima por violencia machista declarada e documentada en Ourense.

“Pretendemos visibilizar unha das lacras da nosa sociedade. Dende que comezou o ano 2017 foron asasinadas decenas de mulleres por violencia machista. A proposta de nomear unha praza a Asunción González non lles devolverá a vida pero é un símbolo que nos lembrará cada día a todas esas mulleres historicamente sometidas á violencia patriarcal, afirma a concelleira de Ourense en Común Ledicia Piñeiro.

A proposta do grupo municipalista OUeC pretende abrir en paralelo un proceso de participación veciñal co obxectivo de recoller todas as propostas posibles de mulleres importantes da historia local. “Será un modo de saldar unha débeda histórica con moitas mulleres que en Ourense e no mundo foron invisibles a ollos dunha sociedade masculina que arrinconaba o feminino sempre á esfera do privado”.

Entre outras propostas a edil Ledicia Piñeiro chama a atención por exemplo da pontina Delia Delso, mestra represaliada que podería humanizar a hoxe Praza 200 no barrio do Pino, ou Esperanza Martín Borrajo, pedánea e activista veciñal con forte compromiso co barrio de Covadonga que de seguro tería un maior recoñecemento social que a hoxe Praza 100.

“Son moitos os nomes de mulleres que recoñecer en lugar dos impersoais números ou letras presentes no rueiro de Ourense. Ademais deberán ser as propias veciñas as que fagan chegar as propostas ao concello con máis nomes propios ou xenéricos, ao fin de contas delas son tamén as rúas e as prazas. Non tería sequera porque facer mención a unha muller en concreto, por exemplo para a praza 1000 na estrada de Barra de Miño unha idea podería ser Praza das Rianxeiras, pois sabemos que desta zona proviñan moitas delas e sería recoñecer tamén o seu traballo silenciado”, afirma a concelleira de Ourense en Común Ledicia Piñeiro.

 

ESCOITA O AUDIO DA CONCELLEIRA LEDICIA PIÑEIRO AQUÍ.
OUeC solicitará no pleno que o alcalde se comprometa coas condicións laborais das empresas contratadas polo Concello

OUeC solicitará no pleno que o alcalde se comprometa coas condicións laborais das empresas contratadas polo Concello

  • Ourense en Común quere garantir que non se repitan situacións como as vividas polas traballadoras de Linorsa e Seralia nos últimos meses.
  • Ate o de agora só a ponderación económica tense en conta no momento de adxudicar contratos.
  • Ourense en Común solicita que se teña en conta a necesidade de non incidir negativamente sobre as condicións nas que se desenvolve a prestación laboral ou sobre o propio emprego.

 

Ourense, 23 de agosto de 2016

Ourense en Común presentaba esta mañá unha moción que defenderá no vindeiro pleno ordinario do mes de setembro. Nesta proposta o grupo municipalista solicitará que o alcalde se comprometa a garantir, entre outras, as condicións laborais das traballadoras de empresas contratadas pola institución municipal.  

Ate o de agora só a ponderación económica tense en conta no momento de adxudicar contratos públicos. Deste xeito estase promovendo que naqueles contratos nos que o compoñente económico fundamental vén constituído polo custo da man de obra, a única forma de rebaixar a oferta é empeorando as condicións laborais dos traballadores”.

Esta é a razón, segundo Ourense en Común, dos conflitos vividos nos últimos meses con varias empresas adxudicatarias. Así apuntan a que “todas elas sumaban faltas de pagamento ás traballadoras e presentaron ofertas de licitación que significaron o descontento do persoal a subrogar”.

A moción presentada aposta porque as administracións municipais procuren unha contratación pública estratéxica, sustentable e socialmente responsable que teña en conta non só a calidade e eficacia na prestación de servizos públicos e nas compras públicas, senón tamén a necesidade de non incidir negativamente sobre as condicións nas que se desenvolve a prestación laboral ou sobre o propio emprego. “A oferta economicamente máis vantaxosa non ten por que identificarse coa do prezo máis baixo”, advirten.

Ourense en Común argumenta que a súa proposta está contemplada nunha Directiva do Parlamento Europeo e xa en práctica en varios concellos do estado español sen que isto supuxera en ningún caso a redución do número de licitadores. En base a esta propoñen a inclusión de cláusulas sociais nos procesos de contratación pública, ben como requisito previo (Criterio de Admisión ou Reserva de Mercado), como elemento de puntuación (Criterio de Adxudicación) ou como unha obriga inherente ao propio contrato (Condición en fase de Execución).

A concelleira do PP, Ana Morenza, preséntase sen documentación na Comisión de seguimento da Praza de Abastos nº1

A concelleira do PP, Ana Morenza, preséntase sen documentación na Comisión de seguimento da Praza de Abastos nº1

• A falta de documentación aportada obrigou á oposición a facer constar en acta a solicitude de informes
• A actitude da concelleira pon novamente de manifesto o bloqueo e a falta de información do goberno municipal do PP

A Comisión de seguimento das obras da Praza de Abastos nº1 da cidade reuníase esta mañá, sen que a concelleira de Comercio do Partido Popular aportase documentación algunha para que os grupos da oposición poidan comezar a análise da situación dos traballos por acometer nesta dotación municipal.

O fin desta comisión, solicitada polo PSOE e respaldada por Ourense en Común, é o de fiscalizar e supervisar as obras de reforma da Praza de Abastos de As Burgas, para garantir a correcta execución dos traballos.

Ana F. Morenza presentábase na comisión sen o expediente nin documento algún referido á resolución definitiva do proxecto, á solicitude de prórroga e o informe que a ampara, ou á resolución da citada prórroga polo Ministerio de Fomento. E ante a demanda da oposición de que lle fosen facilitados os documentos, instou aos grupos a cursar a solicitude por escrito, ralentizando o proceso de fiscalización que a comisión ten como obxectivo.

A actitude da concelleira pon novamente de manifesto o permanente bloqueo e a falta de información que caracteriza ao goberno municipal do PP, polo que os grupos da oposición demandaron que constara en acta a petición de documentación, evitando cursar novas instancias.

De demorarse o proceso de reforma da Praza de Abastos, poderían chegar a perderse as subvencións que a través do 1,5% cultural de Fomento tén concedidas o Concello de Ourense para rehabilitar este equipamento.

A comisión reunirase novamente o próximo 19 de maio.

OUeC advirte que de non conseguir unha integración digna do AVE, debería ser o propio Jesús Vázquez quen tomara a iniciativa de dimitir

OUeC advirte que de non conseguir unha integración digna do AVE, debería ser o propio Jesús Vázquez quen tomara a iniciativa de dimitir

Ourense en Común optará pola abstención na solicitude de Democracia Ourensana ao existir “numerosas incoherencias” na súa proposta.

O grupo municipal Ourense en Común comunica que ten decidida xa a súa posición de voto para o pleno extraordinario de mañá martes, solicitado por Democracia Ourensana para pedir a dimisión do alcalde se non consigue unha serie de compromisos na integración da alta velocidade en Ourense.

“Dende Ourense en Común compartimos a indignación de Gonzalo Pérez Jácome pola mala xestión que o Partido Popular e o propio Jesús Vázquez están amosando na integración do AVE. É evidente que falta coordinación entre administracións na redacción de proxectos, deféndese unha intermodalidade ficticia, existe inacción para reducir o seu impacto, etc. Pero malia a todo o anterior, a moción presentada por Democracia Ourensana para o seu debate é insostible en termos de coherencia política”, apunta o voceiro Martiño Xosé Vázquez.

A asemblea veciñal aberta que Ourense en Común celebrou a pasada semana nas Burgas decidía non apoiar a moción de Democracia Ourensana ao observar numerosas incoherencias na súa solicitude.

“Gonzalo Pérez Jácome solicita a dimisión do alcalde se non consigue unha serie de compromisos en datas concretas que no texto non se definen (aparecen citadas: 30 de abril, 15 de maio e 30 de maio). Ao marxe de posibles erros de redacción, non é lóxico condicionar a dimisión do alcalde a unha data que non depende do propio concello senón da administración autonómica e estatal.

De igual modo, cítanse características que debe ter a nova estación de tren como metros cadrados para oficinas ou restaurantes, que deberían ser valoradas por técnicos competentes e non por políticos. Nós estamos para definir o que facer, neste caso unha estación intermodal e permeable entre barrios, non para definir o como nin o quen. Algo que non todos os grupos comprenden”.

O grupo municipalista tiña previsto emendar o texto a debater pero o carácter extraordinario do pleno impide esa fórmula. Razón pola que malia a concordar en parte, non apoiarán a moción de Democracia Ourensana e optarán por absterse na votación.

“Pedirémoslle ao alcalde D. Jesús Vázquez Abad que asuma os compromisos que aparecen no seu propio programa e que o propio Partido Popular defendeu no pasado ao respecto da integración do AVE en Ourense. Na súa man quedará loitar por eles e non ser vítima das estratexias electorais do seu propio partido. No caso de non conseguilos debería dimitir por iniciativa propia sen que Gonzalo Pérez Jácome o solicitara, pois estamos perante a infraestrutura máis relevante para o noso concello nos próximos cen anos”.

Ourense en Común segue manifestando o seu desconcerto polo que entenden como “falta de coordinación” entre a administración autonómica e estatal para a construción dunha Estación Intermodal que integre a alta velocidade e o servizo de autobuses actualmente emprazado no barrio do Pino.

“A verdade é que todo o que está acontecendo nesta materia é desconcertante. O concurso de adxudicación para a redacción do proxecto da estación de autobuses á empresa PROYFE S.L. foi convocado sen saber aínda como será a futura estación. Como vai ser posible logo falar dunha intermodalidade real e efectiva?”

A organización municipalista segue solicitando que unha actuación da magnitude como a pretendida se desenvolva de modo coordinado, primando en escala a superación da fenda histórica que supón a vía do tren entre barrios e logo o deseño dunha infraestrutura que permita un intercambio cómodo entre medios de transporte: tren e autobús, entre outros.

“O encargo para a elaboración dun proxecto para a nova estación de autobuses sen coñecer como será o desenvolvemento do ámbito condicionará calquera actuación complementaria. Intervencións urbanísticas tan importantes como superar a fenda histórica de separación entre barrios provocada polas vías de tren”.

Sobre a propia estación, Ourense en Común advirte que non apoiará ningunha infraestrutura que non contemple a intermodalidade real e efectiva entre os diferentes medios de transporte: autobuses interurbanos, área metropolitana e transporte urbano, así como co resto de liñas de ferrocarril de proximidade.

“Se a inversión autonómica non vai servir para dar resposta á demanda colectiva sobre a necesidade dunha estación que achegue barrios divididos e prime a utilidade é mellor que non a fagan e orienten a partida de cara a outras necesidades. Pois o que se pretende non é intermodalidade. Poderá servir como reclamo electoral do Partido Popular a poucos meses dunha cita electoral, pero será un fraude para a cidade de Ourense e para os ourensáns que perderán unha oportunidade histórica de rexeneración urbana”.

 

Ourense en Común reproba ao goberno e á oposición

Ourense en Común reproba ao goberno e á oposición

08/02/2016 Intervención de Ourense en Común no pleno de reprobación a Jesús Vázquez Abad (Alcalde do Concello de Ourense)

(Baixa o documento en PDF)
07/06/2013 Intervención de Susana Gómez, antiga edil de Democracia Ourensana, instando á oposición a «abandonar o xogo das reprobacións e ser valentes propoñendo unha moción de censura. Do contrario que fagan oposición constructiva.»
OUeC chama ao PSdeG-PSOE a facer cidade e abandonar estratexias políticas

OUeC chama ao PSdeG-PSOE a facer cidade e abandonar estratexias políticas

O grupo municipal Ourense en Común apunta que as declaracións difundidas a medios polo Grupo Municipal Socialista forman parte da mesma estratexia política que pretende xerar o contexto apropiado para unha moción de censura.

 

  • “Dende o mes de setembro vimos advertindo un incumprimento do prego de condicións do servizo de axuda no fogar e incluso presentamos unha moción para constituír unha comisión de investigación da empresa concesionaria que Partido Socialista e Partido Popular votaron en contra”. Así é que a organización municipalista Ourense en Común amosa a súa indignación coas declaracións do grupo socialista ao entender que entran en contradición coas súas accións. “Sumámonos á reprobación da acción de goberno do Partido Popular en materia de servizos sociais, pois acumúlanse conflitos e irregularidades xa dende a anterior corporación, pero se o Partido Socialista quere traballar por esta cidade nesta área debería comezar por apoiar a constitución daquela comisión de investigación”.

 

  • As irregularidades apuntadas por Ourense en Común, e polas que solicitaban a constitución daquela comisión de investigación votada en contra polo Partido Popular e Partido Socialista, refírense á empresa Seralia S.A. responsable do servizo de Axuda no Fogar actualmente cun ERTE desestimado pola autoridade laboral competente e que segundo eles “pode estar a incumprir varios dos artigos das cláusulas administrativas, nomeadamente o artigo 24 de obrigacións do contratista durante a execución do contrato e o artigo 25 de obrigas laborais do contratista”.

 

  • Diferentes empresas pasaron ao longo dos últimos anos por estes servizos e ningunha estivo exenta de dúbidas na súa actividade. De feito a adxudicataria Troncoso, cunha investigación aínda en trámite iniciada polo xuíz Antonio Piña, implicou á anterior xestión do PSOE. Na mesma liña destaca Fomento de Servicios Sociosanitarios que a anterior concelleira, Marga Martín, desatendeu ao non escoitar as demandas das traballadoras (non cobrar por horas efectivas de traballo) e á que o interventor municipal chegou a sinalar como xestión irregular.

 

  • Dende Ourense en Común concordan con que “a xestión da Concellería de Benestar está sendo moi deficiente, neste servizo de Axuda no Fogar e noutros servizos e proxectos que non mostran ningún avance, nomeadamete a Canceira Municipal, a ordenanza de protección animal, a prestación a persoas en risco de pobreza ou exclusión social dentro do programa Ourense Integra, etc. Malia a todo o anterior entenden que “o Partido Socialista unicamente orquestra esta posta en escena de cara a medios de comunicación cun fin estratéxico de xeración de contexto. A súa denuncia dista moito da súa actividade diaria nos momentos transcendentes como as votacións en pleno ou na súa actividade nas xuntas de área que poden consultarse nas actas”.