Ourense en Común supera xa o 50 por cento do obxectivo marcado de doazóns

Un dos obxectivos de Ourense en Común, facer unha campaña baseada unicamente nun financiamento colaborativo, sen dependencia algunha que poida deturpar o noso labor dentro e fóra do Concello, vai vento en popa.

Cando aínda faltan once días para que remate o prazo da campaña de achegas a Ourense en Común acadamos xa 1.540 euros, o 61 por cento do obxectivo marcado de sementes, 2.500 euros. Isto é grazas á colaboración desinteresada de, a día 6 de maio, trinta e dúas mecenas.

Con respecto aos microcréditos, a outra fórmula que empregamos para afrontar os nosos gastos de campaña, a porcentaxe é aínda maior xa que dispoñemos arestora de 1.900 euros, o 63 por cento dos 3.000 euros que nos puxemos como límite. Ata o de agora dez persoas fixérono posible.

Transparencia, coherencia e ética é isto. Non depender de créditos bancarios para financiar a nosa austera campaña política, que comeza o venres. Tampouco permitimos doazóns de empresas nin de particulares que condicionen a nosa independencia. Non só hai que dicilo, nós facemos o que predicamos. Ourense en Común só rende conta ás veciñas e veciños da cidade e cremos que soamente deben ser elas e eles, que coma nós cren que hai outro xeito posible de xestionar, os que nos ofrezan a súa axuda.

Sementando xuntas, recolleremos xuntas.

Imaxe de achegas, con sementes que permiten medrar este proxecto en común

Encontro co Centro Comercial Aberto Ourense Centro

Encontro co Centro Comercial Aberto Ourense Centro

O martes 5 de maio os candidatos de Ourense en Común Miguel Doval e Carlos García reuníronse co Presidente do CCAOC, Luís Rivera, co tesoureiro desta asociación, Gaspar Sierra, e coa xerente, Lorena Tato. Despois de explicar brevemente o noso proxecto, interesámonos en coñecer as súas demandas.

Os pequenos empresarios aquí representados amósannos as súas queixas pola pouca implicación e falta de colaboración en xeral das administracións, o que deriva en políticas pouco ou nada axeitadas para o desenvolvemento do comercio local. Afirman, ademais, que a ausencia de acordo entre os distintos grupos políticos que conforman a día de hoxe o Concello e as marcadas diferencias entre a administación local, a provincial e a autonómica imposibilitan avances na resolución de problemas importantes. Situación á que non axuda en nada o baixo poder adquisitivo das ourensás e dos ourensáns debido ás baixas rendas e ao desemprego. A isto, apuntan dende o CCAOC, hai que engadir o alto custo das taxas municipais, principalmente o IBI. Avogan por unha revisión deste imposto e unha maior progresividade. Critican do mesmo xeito o feito de ter tantos impedimentos para dotar aos comercios da debida accesibilidade para as persoas con diversidade funcional, e solicitan axuda técnica e económica.

Os comerciantes esixen tamén o mesmo calendario de apertura para os pequenos comercios que para os grandes centros comerciais, evitando así a competencia desleal, facilitada pola falta de labores de inspección da Xunta. Ademais, a presión continua das grandes cadeas obriga a uns cada vez máis estensos horarios, con efectos moi negativos na conciliación. Porén, as discriminacións respecto das grandes empresas son máis, pois o trato que estas reciben do concello é previlexiado ata o punto de que non colaboran en gastos comúns dos comercios da zona, como por exemplo o pago do alumeado de Nadal. Precisamente respecto do alumeado, que ata hai moi pouco o pagaban só os comerciantes, hai queixas de que este chega tarde e mal, revertindo de forma negativa no consumo. Comunican así mesmo que a Mesa Local de Comercios, na que se sentan representantes das asociacións de comerciantes co Concello e a Xunta, está practicamente desactivada. Só teñen algunhas sesións para informar dos programas de axudas.

E así, día tras día van pechando negocios, quedando moitos baixos baleiros mesmo no centro. O alto prezo dos alugueiros dificulta a subsistencia dos que quedan e limita a apertura de novos comercios. En conclusión, o CCAOC solicita un acordo entre as diferentes forzas para elaborar e desenvolver un plan de actuación que axude ao pequeno comercio, xa que, engaden, as actuacións puntuais non serven para arranxar nada: é precisa unha planificación de accións que permita unha mellora efectiva real da situación.

Desde Ourense en Común trasladóuselle que, precisamente, no noso Programa Participativo inclúese un Plan de Apoio ao Comercio e aos Produtos Locais para sensibilizar á poboación a través de accións de promoción como a creación dunha marca de calidade propia de Ourense, feiras, mostras, obradoiros, publicidade… Ademais, recollemos un plan integral para a revitalización de áreas comerciais e un programa completo de medidas que atenda ás necesidades concretas das PYMES.

Foto da xuntanza co CCAOC

Ourense en Común xa gañou

Ourense en Común xa gañou

Ourense en Común xa gañou. Por que? Porque non precisamos gobernar para levar a cabo o tan desexado e necesario cambio, nós xa comezamos a mudar o xeito de facer política. Como? Empuxando aos partidos políticos tradicionais, e mesmo tamén ao que se financiou ilegalmente, a sumarse ao carro da participación e da transparencia. Gañamos xerando na conciencia das ourensás e dos ourensáns a idea de que é posible ese cambio e de que todas e todos podemos axudar a desenvolvelo. Como dixo Eduardo Galeano “Moita xente pequena, en lugares pequenos, facendo cousas pequenas pode cambiar o mundo”.

Pero párense a pensar. Hai transparencia real nun partido que agora fai bandeira dela pero leva gobernando na Deputación de Ourense (por poñer un só exemplo), durante 28 anos, do xeito máis oscurantista que unha poida imaxinar? Hai participación directa nesta rancia institución na que unha estirpe manda en base ao clientelismo político? E no concello, de que xeito puidemos nós colaborar contra catro anos de desgoberno, con imputacións e insultos mensuais? Pero os tempos están obrigando a eses partidos e a esas institucións, que funcionan cunha estrutura xerárquica na que a única participación que se ofrece é a posibilidade de votar cada catro anos, a transformar o seu xeito de facer política. Pero unha cousa son as verbas e outra ben distinta, os feitos. Velaquí o feito por un Ourense do ben común: Programa colaborativo.

Por moito que tamén outras organizacións políticas presuman deses adxectivos tan de moda malia que marcharon dun proxecto porque non se sentían cómodos con esta nova maneira de traballar, Ourense en Común somos as únicas que contamos cun Programa Participativo Real, ambicioso pero realista. Estas propostas foron escoitadas na rúa, elaboradas nos barrios da cidade, en nove mesas sectoriais, man a man, xuntas. Aquí están recollidas as necesidades urxentes dunha cidade que non se pode permitir ter a 25 mil persoas en risco de pobreza (datos do IGE). Nós apostamos polo bo vivir, para todas e todos, non só para un fato de persoas, para as nosas fillas e fillos, netas e netos e para as que nos visitan. Respectando a cidade, porque o noso, ten moito valor só precisamos poñelo en valor. O progreso e o desenvolvemento económico poden ir da man co coidado do medio e son posibles sen esquecer nunca a xustiza social. O Ourense que soñamos e pretendemos é a cidade da xente.

[metaslider id=2145]
Ourense, Centro Cívico Colón. Martes, 4 de maio.

Esta foi a presentación do noso programa, o voso programa. Dende hoxe e ata o 22 de maio tentaremos debullalo para que poidades saber e comprender que é o que pretende Ourense en Común.