Ourense en Común inicia unha campaña austera, limpa e de proximidade

Ourense en Común inicia unha campaña austera, limpa e de proximidade

• A candidatura encabezada por Martiño X. Vázquez pegará únicamente tres cartaces nas rúas, “por unha cuestión de ecoloxía e limpeza”.
“Iremos a onde está a xente”. Baixo un formato nomeado “barlamento”, bares en diferentes barrios da cidade acollerán faladoiros de políticas municipais nun ambiente distendido.
• 5.000 xornais sairán á rúa, presentando “un programa en alianza co tecido social da cidade, e unha candidatura profesional para un goberno eficiente”.

    Co gallo do inicio da campaña cara a cita electoral do 26M, Martiño Xosé Vázquez, avanza que a de Ourense en Común será unha campaña “sustentable e austera”, e explica que “por unha cuestión de ecoloxía e limpeza non teremos carteis ensuciando as rúas, nin competindo en solapar e pegar uns por riba de outros”.

A candidatura pegará  únicamente tres cartaces, nos espazos habilitados no Parque de San Lázaro, Posío e A Ponte, e apoiaránse en dez lonas en diferentes puntos da cidade para visibilizar a candidatura coa que concorren ás urnas.

    Cunha media de idade de 38 anos, os primeiros nomes da lista centrarán a imaxe de campaña.  Martiño X. Vázquez, historiador e arqueólogo vencellado á economía do terceiro sector, Montse Valencia, profesional no eido do dereito ambiental, Antía Pousa, mediadora social vencellada ao movemento feminista, e Xosé Vaquero, bombeiro municipal, representan “unha xeración capacitada e moi ben formada para transformar o futuro de aquí e dende aquí, un futuro que pasa polo ecoloxismo e o feminismo, para un desenvolvemento de progreso, eco-consciente e respectuoso para as persoas, que nos impulse a un futuro prometedor para Ourense”.

    O candidato a alcaldía adianta ademais unha campaña “de proximidade, de moita presencia na rúa. Pasearemos os barrios e estaremos a disposición da veciñanza para ser interpeladas”.

    Nos barrios farán reparto dun xornal no que “presentamos o modelo de cidade que queremos, as nosas propostas estratéxicas para Ourense, e contamos quen somos, tamén desde o plano persoal”.

    A campaña de OUeC reivindicará ademais “a importancia dos espazos para o diálogo, que cada salón, cada cociña, cada bar sexa un ágora onde debater”, polo que comezando o próximo luns no Posío,  “iremos a onde está a xente”, e visitarán bares dos diferentes barrios da cidade cun formato nomeado “barlamento”, promovendo “faladoiros temáticos nun ambiente distendido”.

    O candidato á alcaldía conclúe que “Ourense xógase moito nesta campaña: continuar coa dinámica de maltrato á cidade ou por fin mirar cara ao futuro e avanzar. Nós saimos a recuperar o futuro”.

Incorporamos a voz dos colectivos ao noso Programa Participativo

Incorporamos a voz dos colectivos ao noso Programa Participativo

• Martiño X. Vázquez, candidato á alcaldía, e a número 2 da lista, Montse Valencia, mantiñan esta mañá sendas xuntanzas, con representantes da UGT e Amigos da Terra.
• Nas últimas semanas sucedéronse as reunións con colexios oficiais, sindicatos, asociacións e actores estratéxicos da cidade “para enriquecer o noso programa de goberno”.
“A xestión municipal suspende en moitas áreas. O concello pode facer moito máis. Nós faremos moito máis. O primeiro é darlles aos colectivos voz e capacidade para condicionar as políticas locais”.

        Ourense en Común mantén para a cita electoral do 26M a liña de traballo iniciada en 2015, diagnosticando a situación na que se atopan os servizos municipais desde a perspectiva dos sindicatos, colexios oficiais, asociacións, entidades e veciñas e veciños da cidade, cos que vén mantendo xuntanzas nas ultimas semanas, recollendo propostas e alternativas na xestión das diferentes áreas dos servizos municipais, e incorporándoas ao Programa Participativo co que concorrerá ás urnas.

    Entre outros colectivos, a candidatura mantivo reunións coa Coordinadora galega de ONGs, CCOO, a Asociación Española de Prevención de Accidentes de Tráfico -P(A)T-, os traballadores do Centro de Coñecemento da Molinera, co Sindicato de Policías Municipais, con representantes do corpo de Bombeiros, Stop Accidentes, Stop Desafiuzamentos, o Colexio de Arquitectos, ou o Foro Liceo, abordando as necesidades para “garantir a prestación de servizos de calidade ás cidadás, desde unha institución cercana, que faga á xente protagonista e redefina o concepto de gobernantes e gobernados. Temos un compromiso ético colectivo para cambiar de vez a forma de facer as cousas. O primeiro é darlles aos colectivos voz e capacidade para condicionar as políticas locais”.

    Os encontros máis recentes producíanse na mañá de hoxe, en que Martiño X. Vázquez, candidato á alcaldía, e a número 2 da lista, Montse Valencia, reuníanse primeiro con delegados do sindicato UGT, cos que compartiron as medidas que Ourense en Común propón para frear o devalo demográfico e a perda de capital humano derivada da crise económica, e logo con representantes de Amigos da Terra, coas que compartiron a necesidade de mudar as políticas públicas en materia de medio ambiente para que o Concello de Ourense sexa sostible e teña un futuro.

Equo apoia a candidatura de Ourense en Común “por unha cidade máis verde, máis sostible e con futuro”

Equo apoia a candidatura de Ourense en Común “por unha cidade máis verde, máis sostible e con futuro”

• Stephanie Ordóñez, coportavoz de Equo Galicia e Alberto Prieto, membro da Comisión executiva federal de Equo deron esta mañá respaldo á lista encabezada por Martiño Xosé Vázquez.
• Destacan as propostas para fomentar a mobilidade sostible e de proximidade, potenciar os espazos verdes, ou mellorar a calidade na alimentación dos ourensáns.
“O programa de OUeC está impregnado de tres puntos fundamentais para Equo: o ecoloxismo, o feminismo e a protección do ben común”.

        Stephanie Ordóñez e Alberto Prieto, respectivamente coportavoz de Equo Galicia, e membro da Comisión executiva federal de Equo, visitaban hoxe Ourense para validar as medidas ecoloxistas da candidatura de Ourense en Común, nunha rolda de prensa xunto a Martiño Xosé Vázquez e a súa número 2 e responsable da área de Sustentabilidade ambiental do programa, Montserrat Valencia, que declaraba que “o futuro de Ourense pasa por poñer o mantemento da vida das persoas no centro da acción política, e de que as políticas locais se baseen na xustiza ambiental e social. Repetimos a aposta pola defensa da sustentabilidade ambiental do 2015, nun modelo político, social e económico onde a institución, as organizacións sociais e a propia cidadanía poidan incidir directamente”.

    Desde Equo, Stephanie Ordóñez manifestaba que a organización política e ecoloxista á que representa revalida neste 2019 o apoio de 2015 a Ourense en Común “por unha razón moi clara, porque o seu programa está impregnado de tres puntos fundamentais para Equo: o ecoloxismo, o feminismo e a protección do ben común”, e destacaba que o programa de OUeC “busca o futuro no emprego verde, o mellor para a enerxía, a auga, o tratamento de residuos, e ten conta da protección das cidadás, para que os veciños e veciñas teñan a cidade que queren en merecen: máis verde, máis sostible e con futuro”.

    Alberto Prieto, membro da Comisión executiva federal de Equo, avaliaba Ourense como unha cidade “chea por oportunidades”, e manifestaba que “a aposta por OUeC garante que se poidan aproveitar todas esas potencialidades: dende a compacidade, o cinturón periurbán de vexetación, como a presencia dos ríos, que poden ser unha grande oportunidade para o desarrollo dunha mobilidade sostible en proximidade”. 

OUeC reivindícase como a única ferramenta para impulsar a cidade cara o futuro

OUeC reivindícase como a única ferramenta para impulsar a cidade cara o futuro

• O portavoz nacional de Anova, Antón Sánchez, deu hoxe respaldo á candidatura que encabeza Martiño Xosé Vázquez, “a saída ao estancamento de Ourense é que OUeC poida condicionar o vindeiro goberno local, para que a institución estea á altura do que demanda a sociedade civil”.
• Martiño Xosé Vázquez “viñemos a transformar a realidade, a reverter os catro anos de maltrato á cidade de Ourense e cambiar o futuro”.

    O portavoz nacional de Anova, Antón Sánchez, visitaba esta mañá a cidade de Ourense para manifestar o apoio da Irmandade Nacionalista á candidatura de Ourense en Común.

    Na Praza da Imprenta, ao carón da estatua de Castelao, e mencionándoo como “símbolo da aposta polas alianzas tácticas”, o cabeza de lista por Ourense en Común para as municipais, Martiño X. Vázquez, agradecía a visita de Antón Sánchez e dáballe a benvida “á súa casa, porque esta é a casa común”.

    Antón Sánchez manifestaba que “coñecemos o traballo e o espírito de Ourense en Común, tratando de ser a voz das veciñas e veciños, con metodoloxías abertas á participación, e temos claro que segue a ser un proxecto coherente coa aposta de Anova e co noso compromiso de apoiar en pé de igualdade este tipo de candidaturas, saídas da cidadanía progresista”.

    O líder nacionalista referíase aos catro anos do goberno popular en Ourense como “de estancamento político”, e defende que “a saída boa é a alternativa real é que OUeC poida condicionar o próximo goberno, en defensa de políticas sociais e de progreso”

Chamamos á sociedade ourensá a mobilizarse contra o pelotazo urbanístico do Partido Popular

Chamamos á sociedade ourensá a mobilizarse contra o pelotazo urbanístico do Partido Popular

• Os informes da Intervención e a Secretaría Municipais, detallan “cambios substanciais” no documento, indican “a necesidade dunha segunda exposición pública”, e apuntan que “so o pleno ten a potestade para aprobar o Plan”.
• Martiño Xosé Vázquez interpela ao Colexio de Arquitectos e resto de Colexios Profesionais, ás Federacións e Asociacións veciñais a manifestarse públicamente. “Estámonos a xogar o futuro de Ourense”.
• Desde setembro de 2015 Ourense en Común vén defendendo que o PXOM fose sometido a unha nova exposición pública, “puxemos nomes e apelidos de a quen beneficia este plan”.

    Martiño Xosé Vázquez, candidato á alcaldía por Ourense en Común, facía esta mañá un chamamento a toda a sociedade civil ourensá, para manifestarse “contra o pelotazo urbanístico”, logo de que o Partido Popular veña de aprobar provisionalmente en Xunta de Goberno o Plan Xeral de Ordenación Municipal, “nos minutos de desconto, cometendo falta e tapándolle os ollos aos árbitros”.

    Martiño X. Vázquez solicitaba esta mañá aos medios “que ampliedes a nosa voz para que toda a sociedade civil de Ourense se posicione públicamente contra este pelotazo urbanístico”, apelando nomeadamente ao Colexio de Arquitectos, e a todos os Colexios profesionais con sede en Ourense, ás Federacións Miño e Limiar, ás asociacións veciñais, colectivos, e a todas as entidades sociais, sindicais e políticas, porque “estámonos a xogar o futuro de Ourense das próximas décadas”.

    Desde o grupo sinalan novamente aos “cambiazos” introducidos no PXOM polo PP, que ademais “secuestrou o debate ao pleno, e aproba o documento con dous informes contrarios da secretaría e da intervención municipal”, concluíndo que “o proceder do PP só responde ao interese da especulación inmobiliaria”, e advirten que “imos esgotar a vía administrativa, e se fose necesario chegaremos á vía xudicial”.

    Martiño X. Vázquez explica que o plan do PP “merma as zonas verdes, aumenta o aproveitamento lucrativo do chan e reduce as cargas aos promotores”, e conclúe que “ten tantas modificacións que o único camiño posible para a súa aprobación con lexitimidade e seguridade xurídica pasa por unha nova exposición pública e a súa posterior aprobación no pleno. Non podemos consentir que os mesmos que fixeron caer o PXOM de 2003 poñan en perigo de novo o futuro desta cidade”.

Pedimos no pleno solucións urxentes para mellorar o Servizo de Extinción de Incendios

Pedimos no pleno solucións urxentes para mellorar o Servizo de Extinción de Incendios

• As condicións de precariedade nas que traballa o corpo de bombeiros de Ourense poñen en perigo a súa integridade e non garantizan a axeitada protección da poboación.
• Se outro lume se producise simultáneamente ao da Chavasqueira os medios e o número de efectivos sería insuficiente para intervir, “hoxe estariamos lamentando as consecuencias”.
• O goberno incumpre a ratio de un bombeiro por cada mil habitantes que establece a Unión Europea e a Dirección Xeral de Protección Civil e Emerxencias.

    Logo do recente lume que devastou a Chavasqueira e de visitar o pasado mércores ás traballadoras da instalación termal, e aos bombeiros que participaron na extinción do incendio,  Ourense en Común levará ao último pleno do mandato municipal unha moción para solucionar a situación de precariedade do Servizo de Extinción de Incendios de Ourense.

    Desde o grupo apuntan a que o acaecido na Chavasqueira demostra que “o persoal de garda é apenas suficiente para cubrir unha intervención de certa magnitude”, e que “de terse producido simultaneamente outra emerxencia, a día de hoxe estariamos a lamentar as consecuencias”.

    Desde 2015, o grupo vén solicitando “que se tomen en serio as necesidades do servizo de bombeiros e a seguridade da poboación”, sinalando a “falta de efectivos e o precario e obsoleto dos poucos medios con que contan”, ao que suman a “gravidade de que en Ourense non haxa Plan Municipal de Emerxencias, nin Plan de prevención de lumes, como obriga a normativa”.

    Martiño X. Vázquez cuestiona o labor do equipo de goberno de Jesús Vázquez durante estes catro anos, “prometeu para logo incumprir o prometido. Renovou as promesas para incumprilas outra vez”, e enumera o balance do goberno do PP “negouse a posibilidade de convocar unha oferta pública de emprego e non se cubriron as prazas recollidas na RPT, nin a praza de Xefe do Servizo, fundamental para manter unha correcta estrutura organizativa do corpo. Falta inversión en material e as cantidades aportadas pola patronal compañías de seguros, UNESPA, non foron invertidas”, ao que engade o “continuo desleixo cos traballadores do servizo, que sofren recurrentes diminucións nos seus dereitos laborais”.

    O voceiro de Ourense en Común e candidato á alcaldía conclúe que a situación “é insostible” e apunta á “urxencia de activar solucións: temos unha plantilla de menos de 50 traballadores no corpo de bombeiros (cando tivemos ata 72 no ano 2000), e uns medios obsoletos. Non abonda nin de lonxe para cubrir as necesidades da cidade”.

Progresista, feminista e ecoloxista. Así é a candidatura de Ourense en Común para as eleccións municipais de maio

Progresista, feminista e ecoloxista. Así é a candidatura de Ourense en Común para as eleccións municipais de maio

• Martiño Xosé Vázquez, candidato á alcaldía por Ourense en Común, presentaba hoxe “un equipo de persoas con acreditada solvencia para transformar esta cidade”.
• Miguel Doval, o histórico líder veciñal alcaldable con OUeC no ano 2015, chama a “apostar por homes e mulleres novas con ilusión e forza, pola xeración mellor formada para loitar para que Ourense teña futuro”.

    Na mañá de hoxe presentábase no Espazo en Común das Burgas, a candidatura coa que Ourense en Común concorrerá ás vindeiras eleccións municipais. “Unha candidatura de xente do común, coñecedora da realidade local e dos movementos sociais, guerrilleiras da proximidade e loitadoras do cambio diario, con solvencia acreditada para gobernar e sen máis compromisos que coa veciñanza de Ourense, á que lle pedimos a súa confianza”, apuntaba na súa intervención Martiño Xosé Vázquez, actual voceiro do grupo municipal de Ourense en Común, e candidato á alcaldía desta formación.

    Montse Valencia, xurista comprometida coa sustentabilidade e o dereito ambiental, será a número 2 da lista. “Preséntome por moitas razóns, pero a fundamental é porque quero mirarlle aos ollos ao meu fillo e dicirlle que si hai futuro. Porque outro mundo é posible, ecofeminista e social”, apuntaba ao remate da rolda de prensa.

    A número 3 será igualmente unha muller procurando aplicar unha corrección de xénero que reforza a aposta de Ourense en Común co compromiso de feminizar a política municipal. É o posto que ocupa Antía Pousa, recoñecida activista do movemento feminista, que afirma presentarse, “para tinguir de lila o Concello de Ourense e situar no centro das políticas públicas a loita pola igualdade”.

    O número 4 da lista ocúpao Xosé Vaquero, bombeiro municipal dende hai máis dunha década e representante sindical do corpo, moi implicado na loita deste no último mandato perante a ofensiva privatizadora do Partido Popular. “Din un paso cara adiante porque sinto que teño cousas valiosas que aportar para a construción dunha cidade máis segura e solidaria, e Ourense en Común era o único espazo onde poder facelo”.

    Completan os primeiros postos da lista Ángeles Faraldo, no número 5, farmacéutica na que a candidatura delega a área de Saúde Pública, Martiño Ramos no número 6 para cultura, mestre e recoñecido activista do Espazo Cultural Alternativo de Ourense (ESCUA). Unha das caras máis visibles da loita en defensa dos servizos e empregados públicos, Maravillas Calviño, ocupa o 7 e resérvaselle a área de facenda e xestión municipal. Fernando de la Torre, estudante de economía, é o candidato máis novo para representar as demandas da xuventude, no número 8 da lista. A activista medioambiental María Durán e o arquitecto Alberto Fortes pechan a lista das 10 primeiras.

    No seguinte tramo da candidatura tentáronse recoller todas as sensibilidades presentes na sociedade ourensá. Dende recoñecidas persoas do mundo da música local, do deporte, o benestar animal, a economía de km 0 e a economía social, autónomos, estudantes… “persoas con diferentes puntos de vista e coñecedoras das demandas de moitos sectores da sociedade, que enriquecen a candidatura e a enchen de cores”, en palabras de Martiño Xosé Vázquez.

    Pecha a lista quen nas anteriores eleccións municipais encabezou o proxecto, Miguel Doval, que ocupará o simbólico posto 27 en homenaxe polo seu compromiso e traballo durante estes catro anos. Porque a diferencia do actual alcalde do Partido Popular, “el si soubo escoitar, facer e coidar a veciñanza. Aínda que fóra dende a oposición”, resaltaba hoxe a súa compañeira de bancada Montse Valencia.

Solicitamos no pleno recursos para combater a pobreza no concello de Ourense

Solicitamos no pleno recursos para combater a pobreza no concello de Ourense

• Os indicadores da Rede Galega contra a Pobreza e Cáritas evidencian un aumento da pobreza en Ourense, especialmente acusado entre mulleres e persoas maiores de 65 anos.
• A precarización do mercado laboral non permite que ter traballo garanta saír dunha situación de exclusión social.
• O grupo sinala aos 70 millóns de aforros municipais para crear un Fondo de Protección Social co que combater esta situación.

    O pleno do Concello de Ourense debatirá este venres unha proposta do grupo municipal Ourense en Común que pretende fixar a atención da corporación nos altos índices de pobreza e exclusión social da localidade. Dende a organización municipalista apuntan que “o risco de pobreza e exclusión social é un dos problemas fundamentais que enfronta Ourense”, facéndose eco dos informes publicados durante os últimos anos por diversos organismos e, especialmente, os realizados pola EAPN (Rede Europea de Loita contra a Pobreza).

    Ourense en Común presentará no pleno os datos que demostran a gravidade da situación na cidade das Burgas e, botando man da Memoria de Cáritas, inciden en que “dende o ano 2008, o número de persoas no limiar da pobreza ou en risco de exclusión non para de medrar”, apuntando a que estamos nunha “situación de empobrecemento e precariedade normalizada, onde cada día máis familias en Ourense teñen dificultades para afrontar os pagos do alugueiro, a alimentación ou dos subministros básicos”.

    Martiño X. Vázquez, voceiro do grupo, defende que o Concello de Ourense “ten que achegarse a esta realidade e orientar as políticas públicas a reducir as cifras da pobreza, detrás das que se agochan persoas”. Dende Ourense en Común propoñen a creación dun Fondo de Protección Social, co obxectivo de “atender a todas persoas que o necesiten, ampliando e renovando as axudas se é preciso, e camiñar cara unha renda mínima municipal coa que soportar o drama da ausencia de ingresos ou a precariedade de cada vez máis persoas no noso concello”.

    No grupo urxen axilizar os trámites da xestión deste Fondo, “deixando avanzado o traballo para o próximo ciclo electoral, para que o noso goberno empece a ser fructífero desde o primeiro minuto en que entremos pola porta da alcaldía”.

A asemblea de OUeC fará un chamamento á participación masiva en defensa dos intereses da provincia de cara ás eleccións xerais do 28 de abril

A asemblea de OUeC fará un chamamento á participación masiva en defensa dos intereses da provincia de cara ás eleccións xerais do 28 de abril

• A asemblea acordou este martes manter unha posición autónoma, fiel á filosofía municipalista coa que nacía Ourense en Común no ano 2014.
• Ourense en Común fará un chamamento á participación masiva en defensa de políticas públicas progresistas que dean prioridade ás demandas da provincia de cara ás eleccións xerais.

    Ourense en Común debatía na tarde deste martes, 02 de abril, a posición política da organización municipalista de cara ás eleccións xerais do vindeiro domingo 28. A asemblea decidía manter unha posición autónoma, fiel á filosofía coa que nacía no ano 2014 e non dar apoio a ningunha candidatura concreta perante o excepcional escenario de fragmentación de forzas políticas neste proceso electoral.

    Preténdese con esta posición garantir o respecto á diversidade interna e á pluralidade do espazo. Deste modo todos os recursos de Ourense en Común quedarán á marxe da confrontación electoral, centrando todos os seus esforzos en facer un chamamento á participación masiva en defensa de políticas públicas progresistas que atendan as demandas da provincia de cara ás eleccións xerais.

    A aposta de Ourense en Común pretende reforzar a tese municipalista como a mellor ferramenta de institucionalización das loitas. De introducir unha nova forma de facer política de proximidade, “ao servizo de” e non “en beneficio de”. Desde o pragmatismo, día a día, cara a cara e como ferramenta útil para transformar a realidade en defensa dun ben común de progreso. Ourense en Común é e quere ser unha ferramenta de participación cidadá na vida institucional do Concello de Ourense, baseada nuns principios básicos de xustiza e equidade social e ambiental, coa democracia participativa como método. Unha iniciativa política horizontal, autoxestionada e motivacional, renovable e sostible/resistente por riba das etapas electorais.