Ourense en Común inicia unha recollida de sinaturas pedindo a dimisión de Belén Iglesias como edil de cultura

Ourense en Común inicia unha recollida de sinaturas pedindo a dimisión de Belén Iglesias como edil de cultura

•    O grupo recolle na plataforma Change.org o “clamor” fronte a unha situación que cualifican de “inaudita e de emerxencia” para a cultura no Concello de Ourense.
•    No pleno do mes de xuño, PP e DO salvaron da dimisión á concelleira, votando en contra dunha moción de OUeC pedindo o seu cese tras coñecerse a cancelación do OUFF.
•    A lista de agravios á cultura en mans de Iglesias Cortés “empeza a ser incontable”.

    Ourense en Común iniciaba esta mañá unha recollida de sinaturas na plataforma Change.org, lanzando un SOS pola cultura no Concello de Ourense.

    O grupo pide de novo a dimisión de Belén Iglesias como edil de cultura, pola “incontable lista de agravios” da que é responsable, “perpetrando unha agresión sistemática e inaudita á cultura”.

    Na petición formulan un relatorio do currículo de iniciativas e eventos desmantelados por causa da “xestión fatal” da concelleira, e auguran un escenario que “urxe salvar de emerxencia das mans de Iglesias Cortés, antes de que estas feridas de morte sexan irreversibles”.

Ourense en Común esixe ao goberno local “mover ficha” perante as sucesivas verteduras ao Barbaña

Ourense en Común esixe ao goberno local “mover ficha” perante as sucesivas verteduras ao Barbaña

•    O río recibía onte unha nova vertedura cando aínda non remataron os traballos de descontaminación por hidrocarburos do pasado mes de xuño.
•    Na Comisión de Medio Ambiente de mañá, o grupo reclamará de novo un convenio con especialistas da Universidade, para deseñar unha estratexia de recuperación do río.
•    O grupo acusa ao goberno de “silencio cómplice” e “falta de conciencia ambiental”.

    A aparición de escuma no río Barbaña no día de onte demostra, para Ourense en Común, a cultura da impunidade” vixente en Ourense.  

    En palabras da edil Montse Valencia, “as verteduras recorrentes son a proba evidente de que non existe conciencia nin medo a posibles sancións. E iso débese a que as administracións responsables tanto do seu coidado e prevención como da súa protección, non están a facer o seu traballo”.

    O grupo lamenta esta nova vertedura e apela ao edil responsable en materia de Medio Ambiente no Concello de Ourense, José Araujo, a “implicarse”, lembrándolle a proposta para protexer o Río Barbaña que o grupo lle presentaba hai unhas semanas.

    Na Xunta de área de Medio Ambiente de mañá martes, Ourense en Común volverá a poñer enriba da mesa a mesma proposta, un convenio cun equipo de especialistas da Universidade de Vigo orzamentado en só 4.000 euros, e que serviría para “dar o primeiro paso” e “contar xa en setembro cun coñecemento actualizado do estado ecolóxico, biolóxico, hidromorfolóxico e químico do río, como punto de partida para deseñar unha estratexia de recuperación ambiental, explica Montserrat Valencia.

    O grupo advirte ao alcalde, Jesús Vázquez, de que o silencio do seu goberno despois de cada unha destas verteduras convérteo en “cómplice e actor necesario para que todo siga igual. É responsable do seu estado, e podería facer moito na súa defensa tal e como vimos suxerindo en repetidas ocasións”. 


OUeC lembra ao goberno o seu “compromiso incumprido” para facilitar a continuidade da Feira do 21

OUeC lembra ao goberno o seu “compromiso incumprido” para facilitar a continuidade da Feira do 21

•    A obsoleta ordenanza de venda ambulante vixente no Concello impide dar unha periodicidade a esta feira, recuperada no outubro pasado.
•     O PP votaba a favor da proposta de OueC no pleno de febreiro, “pero non moveu un dedo para facela realidade”.

    Co gallo da celebración da Feira do 21, Ourense en Común lembraba hoxe ao goberno a urxente necesidade” de actualizar a Ordenanza municipal de venda ambulante do Concello de Ourense, unha cuestión á que “o goberno se comprometeu hai meses e aínda non cumpriu”.

    Xa no pasado mes de febreiro, unha moción do grupo para actualizar a normativa fóra aprobada “mesmo cos votos a favor do propio Partido Popular, sen que nos conste que Flora Moure, edil responsable de Comercio, fixera nada desde entón”, apunta Miguel Doval.

    Ourense en Común recollía daquela o sentir da agrupación de comerciantes do Vinteún, “xentes comprometidas que traballaron arreo por recuperar unha tradición aletargada gañándolle a batalla ao esquecemento”, pero que vén a continuidade da iniciativa “lastrada” por unha ordenanza “de hai máis de unha década” que precisa unha “modificación ambiciosa” .

    A vixente normativa, limítase a recoñecer como mercados periódicos as feiras do 7, 17 e 26, o mercado de antigüidades e a venda de polbo, “impedindo e frustrando” que poidan xurdir  novas iniciativas e se manteñan no tempo dentro do marco legal municipal.

    Ourense en Común critica a pasividade coa que o equipo de goberno aborda as cuestións aprobadas no Pleno Municipal, “este é un caso máis do desapego e a falta de respecto e de compromiso deste goberno coas resolucións plenarias. Non fan nada”.

Ourense en Común pide no pleno velar polo cumprimento da Ordenanza Municipal de Normalización Lingüística

Ourense en Común pide no pleno velar polo cumprimento da Ordenanza Municipal de Normalización Lingüística

•    O servizo de Normalización Lingüística do Concello está “infradotado e abandonado” na área de Cultura que dirixe Belén Iglesias.
•     A actividade na institución incumpre “a diario” a Ordenanza Municipal de Normalización.
•     Mocións, expedientes, ou actas, redáctanse “sistemáticamente en castelán, excluíndo ao galego, que tamén se bota en falta nas intervencións plenarias e na atención ao cidadán”.

    No día en que o Real Decreto polo que a Lingua Galega se incorporaba ao sistema educativo galego cumpre trinta e nove anos, Ourense en Común rexistraba hoxe unha moción que defenderá no vindeiro pleno ordinario do mes de agosto, pola que insta ao goberno a velar polo cumprimento da Ordenanza Municipal de Normalización Lingüística.

    Desde o grupo, lamentan que a diario” se incumpra esta norma, e pedirán na sesión plenaria que se convoque á comisión de seguimento que a propia ordenanza establece que debe reunirse dúas veces ao ano, xa que “en máis de tres anos, nunca se convocou con este goberno”.

    Montserrat Valencia, edil de Ourense en Común, sinala a “vergoñenta” política lingüística do equipo de Jesús Vázquez, e denuncia a falta de compromiso do alcalde co galego. A concelleira apunta que o Servizo de Normalización Lingüística municipal “está infradotado e abandonado” xunto coa área de Cultura “nas mans de Belén Iglesias”, algo que considera “un grave erro”, xa que “a defensa da lingua é unha cuestión transversal, que debera depender directamente da Alcaldía”.

    O grupo relata na moción o abundante marco xurídico que respalda a petición, e que pauta como obxectivo das corporacións locais asumir un papel normalizador a través do uso do galego como lingua principal de traballo e de comunicación. 

    A Ordenanza Municipal de Normalización Lingüística vixente no Concello, de febreiro de 1998, está composta por 32 artigos e doce capítulos adicados á defensa do uso do galego, e  non só atinxe ás actuacións internas do Concello -actas, ditames, informes e propostas, expedientes, programas informáticos, ou atención ao cidadán-, senon tamén ás empresas adxudicatarias.

    O grupo extende a “necesidade de compromiso” a toda a corporación, “a redacción das mocións e as intervencións nos plenos adoecen habitualmente de consolidar ao castelán como opción prioritaria”.

OUeC propón reconverter a oficina de turismo da Xunta de Galicia nun Centro de Interpretación da Ponte Vella

OUeC propón reconverter a oficina de turismo da Xunta de Galicia nun Centro de Interpretación da Ponte Vella

•    A oficina quedará sen uso coñecido logo do acordo entre a Xunta e o Concello de Ourense para centralizar a información turística nas instalacións municipais.
•    A localización no lateral dun Ben de Interese Cultural limita calquera intervención sobre os seus usos e volumes.
•    A conversión nun aula interpretativa engadiría valor ao monumento como recurso turístico e serviría para celebrar o punto de encontro entre as veciñas das dúas beiras do Miño.

    A concelleira de Ourense en Común, Montserrat Valencia, interpelaba onte en Xunta de Área ao responsable da actividade turística de Concello de Ourense,  Jorge Pumar, sobre o pacto acadado entre a administración autonómica, a provincial e a local para centralizar a información turística nas oficinas municipais sitas nos pés dos Xardíns do Padre Feijoo.

    O acordo, que segundo un comunicado da administración autonómica “permitiría unificar criterios e aforrar custes”, derivará no peche da oficina de turismo da Xunta de Galicia situada ao carón da Ponte Romana, na beira do Pavillón dos Remedios. O novo “uso descoñecido” ao que se destinará o edificio, queda moi condicionado” ao atoparse anexo ao monumento, declarado Ben de Interese Cultural, razón pola que dende Ourense en Común propoñen transformar as antigas dependencias de información nunha aula interpretativa ligada á propia historia da Ponte Vella, dende a época romana ata a actualidade, explicar como se cruzaba o río antes de existir a ponte, a importancia desta na fundación da cidade, as reformas, expoñer os planos e fotografías antigas…”, explica o voceiro do grupo.

    A solución que suxiren, permitirá engadir valor ao monumento como recurso turístico e garantir que o edificio non quede no abandono”,  segundo Martiño X. Vázquez, que entende que esta é unha moi boa oportunidade para dar a coñecer a toda a veciñanza de Ourense e aos visitantes a historia desta importante infraestrutura que permitiu poñer en contacto as dúas beiras do Miño.

Ourense inicia o verán sen bombeiros suficientes para atender emerxencias

Ourense inicia o verán sen bombeiros suficientes para atender emerxencias

•    O grupo leva unha moción ao pleno de agosto e advirte de que fará responsable ao alcalde de calquera accidente laboral ou civil.
•    O goberno do Partido Popular reduce de 11 a 8 os efectivos de garda no verán, época de maior actividade no parque de bombeiros.
•    A plantilla de bombeiros comezou esta corporación, en 2015, con 54 efectivos, recortados en tres anos de goberno popular ate os 50 da actualidade. En corporacións anteriores eran 72 os efectivos no servizo.

    Ourense en Común avanzaba hoxe que instará no próximo pleno de agosto ao goberno municipal, a “que explique en base a que criterios e baremos de seguridade tomou a decisión de reducir o número de efectivos no corpo de bombeiros nas gardas estivais”.

    Martiño X. Vázquez e Montserrat Valencia, concelleiras do grupo municipal achegábanse na mañá de hoxe ao Parque de Bombeiros no Campo da Feira. O obxectivo da visita era “coñecer de primeira man o estado do servizo no verán”, época na que aumentan o número de intervencións e “non só por lumes, como tivemos oportunidade de comprobar coas fortes treboadas dos últimos días“.

    Ao remate da reunión mantida cos traballadores, Martiño Xosé Vázquez, portavoz do grupo, alertaba do grave risco que volve a vivir a cidade polo desleixo do goberno de Jesús Vázquez”. Á falta dun Plan Municipal de Emerxencias e dun Plan de prevención de lumes,  como obriga a normativa”, súmase a redución do número mínimo de efectivos de garda. “Se antes o ratio era baixo, con 11 bombeiros para unha cidade de máis de 100.000 habitantes, agora o Partido Popular decidiu que ese mínimo tiña que ser de 8. É intolerable“.

    O debate sobre o coñecido como PEMU, e a falta de efectivos no servizo de bombeiros é un tema recurrente”. Se ben no primeiro caso o goberno popular limítase a afirmar dende 2015 que “están a traballar na súa redacción”, no caso da dotación de efectivos, o goberno emitía un comunicado a semana pasada anunciando a redución do retén de garda durante o verán,  a oito bombeiros. Unha decisión tomada “de xeito unilateral polo goberno local, sen respaldo dos representantes dos traballadores, sen fundamentarse en ningún tipo de protocolo, e sen avaliar os riscos que de tal redución se desprenden“. Así é que varios sindicatos xa teñen manifestado o seu descontento co proceder do goberno de Jesús Vázquez solicitando incluso un deles (UGT) por escrito, o relevo do responsable do servicio e que a corporación municipal tome medidas.

    “En 2015 xa propuxemos unha comisión técnica para avaliar as necesidades do servizo; tres anos despois o abandono por parte do goberno continúa, e é tempo de explicacións: onde están os cartos de UNESPA destinados a mellorar o parque?, por que non foron cubertas as prazas de bombeiros cando a propia Lei Montoro permite a cobertura destes postos estratéxicos?, cales foron os criterios para reducir os efectivos de garda no verán? Ter a cidade abandonada é preocupante, o lixo ou o transporte en precario é alarmante, pero non imos tolerar que se poña en risco a vida dos bombeiros e a seguridade cidadá “.

Suxerimos un primeiro paso cara a recuperación ambiental do Barbaña

Suxerimos un primeiro paso cara a recuperación ambiental do Barbaña

•    Ourense en Común propón ao edil de Medio Ambiente unha colaboración coa Universidade que permitiría ter en setembro unha avaliación do estado do río.
•    O goberno segue tendo pendente o cumprimento da moción de OUeC aprobada en novembro de 2016, por “un compromiso para a protección e recuperación do Barbaña”.
•    Os continuos desleixos administrativos e as desfeitas empresariais promoven “un dano irrecuperable para a cidade que precisa ser detido canto antes”.

    Ourense en Común suxería esta mañá ao edil popular José Araujo, responsable da Área de Medio Ambiente, unha colaboración cun equipo da Universidade para elaborar un estudo en oito puntos do Río Barbaña, co fin de “actualizar o coñecemento sobre o estado ecolóxico do río, e para comezar a traballar nas medidas que sexan necesarias para a restauración fluvial e a mellora do estado ambiental do río”.

    A proposición, orzamentada en 4.000 euros, serviría para dar o primeiro paso” e “contar xa en setembro cun coñecemento actualizado do estado ecolóxico, biolóxico, hidromorfolóxico e químico do río”, explica a edil de Ourense en Común, Montserrat Valencia.

    O grupo quere con esta iniciativa “avanzar, que xa toca, na reparación e protección do Barbaña”, e lémbralle ao goberno a moción aprobada en novembro de 2016 cara a un compromiso co río, “o PP tamén votou a favor daquela moción, xa toca comezar a cumprir e comprometerse co Barbaña como merece”.

    Que un río atravese un concello “é un potencial punto de oportunidades ambientais e sociais”, e se ben as competencias sobre o dominio público hidráulico son da Confederación Hidrográfica, “o Concello de Ourense tamén é responsable da súa defensa, e pode levar a cabo accións tendentes a axilizar medidas de prevención, de evitación de danos e de recuperación do río, tal e como propuxemos hoxe ao goberno”.

Reclamamos que se informe á veciñanza do impacto que terá o trazado do AVE en Ourense

Reclamamos que se informe á veciñanza do impacto que terá o trazado do AVE en Ourense

•    Ourense en Común recolleu en San Francisco e Peliquín o malestar veciñal polas incertezas que rodean á infraestrutura.
•    Martiño X. Vázquez advirte do risco de aceptar a actuación provisional e pide “compromisos para a execución da variante exterior”, que permita “reparar unha brecha urbana histórica”.

    Ourense en Común instará ao goberno municipal no pleno do venres, para que organice unha xornada aberta á participación do movemento veciñal, colectivos sociais, e colexios profesionais, e que se fale claro” sobre o impacto da chegada da alta velocidade  á cidade de Ourense, e en particular, sobre a configuración que terá ao seu paso polos barrios de San Francisco e Peliquín.

    O grupo trasladará así, en forma de moción, a manifesta incerteza” que sobre a adaptación da actual vía “se palpa entre a poboación, especialmente nos barrios máis próximos ao trazado ferroviario”.

    Logo de  visitar San Francisco e Peliquín nos recentes meses de  maio e xuño, dando  continuidade á iniciativa A Voz do Barrio coa que Ourense en Común está a percorrer a cidade “para dar voz á veciñanza”, o voceiro do grupo afirma que os veciños e veciñas destas áreas da cidade  “descoñecen por completo o futuro da infraestrutura e demandan información ”.

    Martiño X. Vázquez advirte de que “ningún dos recentes avances sobre o AVE teñen por obxecto reparar a fenda histórica que divide Ourense, ningún namentres non haxa compromisos coa variante exterior, e apela ao goberno a ser honestos e informar debidamenteá veciñanza do custe” que terá, “no día a día e no futuro”, a adaptación do actual trazado para que “o AVE atravese a cidade”.

Defendemos no pleno a identidade e autonomía da Casa da Xuventude

Defendemos no pleno a identidade e autonomía da Casa da Xuventude

•    O Partido Popular na Xunta quere converter o espazo nun centro de iniciativas empresariais.
•    Desde os anos 70, a Casa da Xuventude foi exemplo e símbolo de creación cultural, tolerancia, democracia e participación.
•    Hai tres anos que o goberno municipal ten pendente dar cumprimento a un acordo plenario para a optimización na xestión do espazo.

    Ourense en Común e PSOE defenderán conxuntamente no pleno do próximo venres  unha moción que pretende frear a iniciativa da Dirección Xeral de Xuventude para transformar a Casa da Xuventude nun centro de iniciativas empresariais. Así é que segundo recollen na súa iniciativa, o Partido Popular “quere desmantelar definitivamente un símbolo de creación cultural, tolerancia, democracia e participación”.

    Ambos grupos concordan na necesidade de dar apoio aos proxectos e actividades profesionais e laborais desenvolvidas pola xuventude, compartindo que a loita contra o paro e a emigración xuvenil debe ser un dos grandes retos de Ourense, pero apuntan a que existen na cidade dependencias de titularidade autonómica que poderían prestar apoio e asistencia a emprendedores, sen modificar os usos da Casa da Xuventude nin frustrar a súa necesaria autonomía, engadindo que non se debe esquecer que o sector cultural é un motor de desenvolvemento e innovación tamén no eido económico e laboral”.

    Igualmente lembran que o goberno de Jesús Vázquez ten pendente dende “hai tres anos dar cumprimento a outra moción en defensa da Casa da Xuventude. Unha moción presentada polo Grupo Municipal Socialista e aprobada en pleno o 30 de xullo de 2015, para municipalizar a xestión do espazo, e recuperar o Consello de Xestión como modelo de goberno do centro; un modelo que durante décadas foi pioneiro, e permitía que os colectivos xuvenís foran ao mesmo tempo presidentes, directivas e socias dun verdadeiro espazo de democracia participativa onde medraron mozos e mozas hoxe referentes na vida cultural, social, política ou asociativa de Ourense. “Centos de mozos e mozas, xunto con figuras tan relevantes como a do propio director, Benito Losada, foron quen de construír un símbolo de tolerancia e creatividade”.