Ourense en Común publica o día a día do Concello que non se recolle na web municipal

Ourense en Común publica o día a día do Concello que non se recolle na web municipal

•    Desde xuño de 2015, Ourense en Común fai públicos estes documentos na súa web.
•    O acceso público ás actas é un servizo de transparencia, e unha ferramenta esencial para o empoderamento cidadán.

    Logo de facer unha petición formal a pasada semana, Ourense en Común reiteraba hoxe a súa demanda, implicando a todos os grupos, para que na web municipal sexan publicadas as actas das xuntas de área e comisións que se celebran na vida política municipal. “É fundamental para a democracia que a veciñanza coñeza a parte máis importante do que acontece no Concello, o día a día.

    Desde xuño de 2015 en que entrou na corporación, Ourense en Común publica na súa web as actas das xuntas de área, comisións e consellos municipais aos que as tres concelleiras do grupo asisten como representantes electas.

    Martiño X. Vázquez defende que “estamos paliando os déficits do consistorio, neste caso ofrecendo un servizo de transparencia coas veciñas, que só é cuestión de pura vontade, non de titulares”.

    Nas xuntas de área dase conta das diferentes cuestións plantexadas polos concelleiros ao grupo de goberno municipal, co fin de fiscalizar e facer unha política participativa e resolutiva en cuestións que afectan a toda a cidadanía. Os edís municipais cobran por ir cada martes estas xuntas e, “ao igual que a oposición debe fiscalizar a labor do goberno, a veciñanza debe poder fiscalizar a labor de toda a corporación“.

    En todo caso, o denominador común en case todas estas xuntas e consellos é a incapacidade do actual goberno local para proporcionar a información que se lle solicita en tempo e forma, polo que “é posible que non haxa interese ningún en visibilizar a súa verdadeira cara”.

Pódense consultar as actas premendo aquí.

“Patrimonio habitado” proxéctase no Espazo en Común

“Patrimonio habitado” proxéctase no Espazo en Común

•    O filme documenta os elementos patrimoniais da Reserva da Biosfera Transfronteiriza Gerês – Xurés.
•    O traballo proxectarase mañá martes, ás 20h no Espazo das Burgas, con entrada libre.

    Como cada terceira semana de mes, o Espazo en Común das Burgas volve este martes a retomar a súa actividade audiovisual, poñendo o foco desta volta no rico patrimonio da Reserva da Biosfera Transfronteiriza Gerês – Xurés.

   Patrimonio habitado‘ percorre en 47 minutos de metraxe a “raia seca”, un espazo de especial interese antropolóxico, sociocultural, natural e económico, onde as fronteiras entre Portugal e o sur de Ourense se difuminan.

    O filme viaxa polos seis concellos galegos da Reserva da Biosfera Transfronteiriza Gerês-Xurés – Entrimo, Lobeira, Bande, Lobios, Muíños e Calvos de Randín- e recolle en primeira persoa as memorias das veciñas e veciños que os habitan, documentando o patrimonio material e inmaterial desta zona fronteiriza.

    O traballo achégase de perto aos oficios, festexos, lendas, gastronomía, ás formas de vida deste territorio, e á relación entre a paisaxe e o ser humano nunha área no que o aproveitamento do monte foi moi intensivo; factores que, engadidos aos ríos, serras e monumentos, enriquecen a identidade do Patrimonio do Xurés.

    Inserida no proxecto Patrimonio do Xurés, iniciado pola Consellería de Medio Ambiente e Ordenación do Territorio con fondos FEDER, a peza foi desenvolvida en 2016, con dirección e guion de Illa Bufarda e a producción de MaOs Innovación Social e Feitoría Verde.

    A rexión Transfronteiriza Gerês-Xurés (RBTGX) foi declarada o 27 de Maio de 2009 Reserva da Biosfera pola UNESCO, e está situada na Comunidade Autónoma de Galicia (España) e a Regiâo Norte (Portugal), abranguendo un total de 267.958 ha de territorio protexido en dous espazos naturais divididos polas fronteiras, pero unidos polas características da natureza e a cultura.

    O documental poderá verse mañá martes 18 de abril, desde as 20h da tarde no Espazo en Común (As Burgas, 8), con entrada libre a todo o que desexe asistir.

Ourense en Común evita participar do terceiro “pleno espectáculo” promovido por DO

Ourense en Común evita participar do terceiro “pleno espectáculo” promovido por DO

•    O grupo valorou esta sesión plenaria como un “debate baleiro de quen é incapaz de ser alcalde e de quen sendo alcalde, é incapaz”.
•    Ourense en Común instou hoxe a todos os grupos da corporación a consensuar unha folla de ruta con compromisos firmes ata 2019.
•    A procrastinación afecta ao equipo de Jesús Vázquez, pero tamén ao grupo de Gonzalo Pérez Jácome.

    As tres concelleiras de Ourense en Común non asistiron esta mañá ao pleno extraordinario celebrado no Concello a petición de Democracia Ourensana, exercendo unha “oposición desde a rúa” arroupadas por simpatizantes que se achegaron a este acto de protesta, no que denunciaron desde a Praza Maior que “este terceiro pleno extraordinario en dez días, é únicamente un espectáculo mediático que consume recursos públicos e tempo. O que esperan as veciñas e veciños de Ourense é que aquí dentro traballemos para solucionarlle os seus problemas. O de hoxe, é un debate baleiro para aumentar o ego de quen é alcalde, pero incapaz, e de quen é incapaz de ser alcalde”.

    Argumentando que “a inacción do goberno municipal despois de case dous anos de mandato só é comparable á inacción practicada polo portavoz do principal grupo da oposición”, Martiño X. Vázquez manifestou que “queremos un Ourense que sitúe no centro ás persoas e o seu benestar, e este concello non se goberna nin para Jesús Vázquez nin para o Sr. Jácome, gobérnase para todas e cada unha das veciñas e veciños do 21, de Canedo, do Couto, da Cuña, de Mariñamansa… que non poden agardar a unhas novas eleccións municipais e a eles nos debemos.”

    Tras as declaracións aos medios, Martiño X. Vázquez, Ledicia Piñeiro e Miguel Doval, rexistraron unha instancia solicitando a todos os grupos da corporación a “deixarse de espectáculos televisivos e poñerse a traballar nunha folla de ruta 2017-2019 de consenso”, que permita “avanzar e desbloquear mediante o diálogo”, e por orde de urxencia, a Renda Social Municipal para as persoas que máis o necesitan (tras ter fracasado o programa Ourense Integra do PP),  solucionar os problemas de recollida de lixo e o sistema de colectores soterrados, o proxecto de orzamentos 2017, a política de persoal e a aprobación dunha nova RPT, a aprobación dun PXOM “sen cambiazos”, e en definitiva, que permita establecer un compromiso de mínimos nestas e outras demandas veciñais que requiran do acordo maioritario da corporación.

Ourense en Común presenta alegacións ao expediente para a cesión da Casa da Maxia

Ourense en Común presenta alegacións ao expediente para a cesión da Casa da Maxia

•    O concelleiro de urbanismo, Jesús Cudeiro, artella en segredo desde agosto de 2015 esta cesión á Deputación, agochándoo durante quince meses.
•    Ourense en Común cuestiona a cesión do inmoble, a idoneidade dun Museo dos Bolechas, e o ocultismo e premura coa que o goberno xestiona agora este expediente.
•    O equipo de goberno recortou en 10 días o prazo para a exposición pública do expediente.
•    O grupo alerta que a lexislación vixente obrigará a que o Museo dos Bolechas permaneza durante 30 anos no edificio.

    Ourense en Común presentaba esta mañá unha queixa formal na Xunta de Área de Urbanismo, en referencia ao procedemento co que o equipo de goberno iniciou o expediente para a cesión da Casa da Maxia á Deputación, denunciando “a axenda oculta coa que o concelleiro desta área, Jesús Cudeiro, agochou estes trámites dende agosto de 2015 ata novembro de 2016”.

    En paralelo, o grupo rexistraba tamén na xornada de hoxe dúas alegacións para que sexan incorporadas ao expediente, nas que cuestiona a idoneidade de crear un espazo museístico neste edificio, que iría en detrimento das actividades de carácter social que se desenvolven na actualidade no inmoble, como son o servizo de ludoteca ou o traballo da única asociación de lactancia da cidade de Ourense -Arrolos de Teta-.

    Ourense en Común alega ademáis que, segundo o Regulamento de Bens das Entidades Locais, o expediente ten que someterse a información pública durante un mes, “e non cun prazo de vinte días como se está facendo, polo que solicita que sexa subsanada a irregularidade.

    Despois de consultar o expediente a pasada semana, Martiño Xosé Vázquez solicitaba tamén na xunta de área celebrada hoxe, o informe que avalía o risco económico da cesión,  xa que o “edificio, de todos os ourensáns e valorado en 400.000 €”, rehabilitouse no ano 2008 con axudas europeas , “en perigo de perderse con este agasallo á Deputación”.

    Martiño X. Vázquez plantexaba o pasado xoves en rolde de prensa as dúbidas que esperta no seu grupo esta cesión,  “se en verdade era un proxecto tan bo, por que se ocultou durante máis dun ano”,  cuestionando “que sexa un Museo dos Bolechas o que precisa esa zona durante os próximos trinta anos” e denunciando o detrimento que para as veciñas e veciños de Ourense supoñería a perda dun edificio valorado en 400.000€ que “presta actualmente un servizo fundamental de conciliación familiar e para o desenvolvemento asociativo”.

Ourense en Común abandona o pleno para non alimentar o “circo mediático” de DO coa Praza da Ponte

Ourense en Común abandona o pleno para non alimentar o “circo mediático” de DO coa Praza da Ponte

•    Martiño X. Vázquez, Ledicia Piñeiro e Miguel Doval ausentaronse do pleno durante a moción de DO, que calificaron de “estéril e redundante”.
•    No último mes celebráronse xa duas sesións extraordinarias para abordar a parálise da Praza nº2, da que os únicos responsables son os membros do equipo de goberno.
•    Ourense en Común defende un modelo de xestión integral con postos individualizados.

    Logo de que se celebrasen nos últimos días dous plenos extraordinarios referidos á Praza de Abastos da Ponte, Democracia Ourensana redundaba hoxe introducindo novamente este asunto como moción na sesión plenaria ordinaria do mes de abril.

    Na súa quenda de palabra, Martiño X. Vázquez remitiuse ás actas da sesión extraordinaria do pasado 3 de abril, na que que o seu grupo “xa manifestou a súa opinión sobre a solicitude do Sr. Jacome”, solicitando  “rematar con este circo mediático e deixar de consumir tempo e recursos municipais nun debate que debería estarse dando noutros termos e noutros foros”.

    Vázquez instou directamente ao grupo de goberno a procurar unha solución definitiva para aperturar esta Praza. “Vostedes son o goberno e teñen a responsabilidade. Se non son quen de asumilo dimitan das súas funcións. E se queren que colaboremos e traballemos convóquenos a unha mesa de traballo e non a sesións plenarias, que xa tivemos bastantes”.

    O voceiro de Ourense en Común fixo mención ao modelo de xestión integral da Praza que o seu grupo defende, con postos individualizados, suxerindo que sexa o Concello de Ourense quen asuma inicialmente a xestión da praza, sacando a concesión cada posto de forma individualizada, para nun segundo momento explorar a posibilidade dunha nova concesión integral, ou permitir agrupar en sociedade ou cooperativa aos praceiros que xa ocupen a praza, explorando fórmulas de concesión progresiva para fomentar o autoemprego para cada posto e incorporando esta dotación ao Plan de Mercados Excelentes da Secretaría Xeral de Comercio.

Martiño Xosé Vázquez concluía a súa intervención anunciando que “Ourense en Común non volverá a tratar este tema nun pleno municipal. Se queren que colaboremos e traballemos convóquenos a unha mesa de traballo e non a sesións plenarias que xa tivemos bastantes”.

O grupo calificou a moción de DO como “estéril e redundante”, criticando e aclarando que “se hai quen quere empregar os recursos públicos para facer películas, nós non somos actores”, abandonando a continuación os tres edís o pleno, do que se ausentaron durante o debate desta moción.

Ourense en Común denuncia a axenda oculta coa que o PP pretende ceder a Casa da Maxia á Deputación

Ourense en Común denuncia a axenda oculta coa que o PP pretende ceder a Casa da Maxia á Deputación

•    O concelleiro de urbanismo, Jesús Cudeiro, artella desde agosto de 2015 esta cesión á Deputación, agochándoo durante quince meses.
•    O novo uso como Museo dos Bolechas debería manterse durante 30 anos segundo a lexislación vixente.
•    A cesión pon en serio risco a credibilidade do Concello de Ourense despois de que a edificación fora construída con fondos europeos do Programa Urban II.
•    Por incapaz, Jesús Vázquez non goberna xa esta cidade, estalla gobernando Baltar desde o Pazo Provincial.

    Ourense en Común avaliaba esta mañá en rolda de prensa os recentes acordos do nomeado Comité de cooperación permanente Deputación-Concello de Ourense,  concluíndo que “o alcalde agocha con moitos selfies o goberno municipal máis inactivo en décadas e a súa incapacidade para presentar uns orzamentos, reparar un camiño, asfaltar un vial ou construír un muro de contención, botando man daquel que goberna en verdade na sombra esta cidade e esta provincia, Manuel Baltar“.

    Martiño X. expoñía que o Plan de Investimentos que se presentaba onte, “non chega de balde e ten un custo, o regalo por parte do Sr. Vázquez Abad dun equipamento de titularidade municipal valorado en case 400.000 €.

    Logo de revisar esta semana o expediente da coñecida como Casa da Maxia, Ourense en Común revelaba hoxe que Jesús Cudeiro Mazaira, responsable da crise urbanística de Ourense dende 2003 e asesor de confianza do Sr. Baltar ao tempo que Concelleiro de Urbanismo, ditaba unha providencia o 28 de agosto de 2015, pola que se ordenaba iniciar expediente de cesión gratuíta deste edificio á Deputación.

    Esto foi xa días antes de que quedara constituído o denominado Comité de cooperación permanente Concello-Deputación, e “durante 15 meses mantívose agochado ata este outono”, en que se anunciaba un Museo dos Bolechas nese espazo, baseado nunha cuestionable memoria xustificativa de folla e media que argumenta o impacto que tería tal proxecto museístico no Concello.

    Á vista do expediente, Ourense en Común puido saber que o uso como Museo dos Bolechas debería manterse alomenos durante os próximos 30 anos segundo a lexislación vixente.

    Martiño X. Vázquez plantexaba esta mañá as dúbidas que esperta no seu grupo esta cesión,  “se en verdade era un proxecto tan bo, por que se ocultou durante máis dun ano”,  cuestionando “que sexa un Museo dos Bolechas o que precisa esa zona durante os próximos trinta anos” e denunciando o detrimento que para as veciñas e veciños de Ourense supoñería a perda dun edificio valorado en 400.000€ que “presta actualmente un servizo fundamental de conciliación familiar e desenvolvemento asociativo.

Ourense en Común avalía como “indignantes” os orzamentos xerais do Estado

Ourense en Común avalía como “indignantes” os orzamentos xerais do Estado

•    O Partido Popular non está defendendo os intereses de Ourense.
•    O alcalde asumiu xa que non haberá variante exterior.
•    O Arqueolóxico sumará dúas décadas coas portas pechadas.
•    O desgoberno local pon en risco a partida para a reforma da Praza de Abastos das Burgas .

    Martiño X. Vázquez, voceiro de Ourense en Común, avaliaba esta mañá os orzamentos xerais do estado presentados o pasado martes, considerando que o “recorte salvaxe de case 300 millóns de euros” debera ter un resultado directo coa dimisión en bloque dos cargos electos do Partido Popular na provincia e os concellos ourensáns,  porque “ningún está defendendo os intereses de Ourense”.

    Martiño criticou a partida orzamentaria destinada á Alta Velocidade, que “despois dunha década, aínda non garante a súa execución, nin un compromiso firme coa variante exterior como xa asumiu o alcalde, que ademais de ser o AlcaldeSEN orzamentos, sen PXOM, sen RPT, semella que será tamén o alcalde sen Variante Exterior, perpetuando a fenda histórica que divide barrios deste Concello”.

    O voceiro trasladaba aos medios a indignación do seu grupo á vista dos  orzamentos, “que ademais de non garantir os compromisos adquiridos coas necesidades de Ourense, amosan un claro descoñecemento da realidade local”, en referencia á partida de un millón de euros para unha sede da CHMS que “dificilmente será executada despois da mala praxe do equipo do desgoberno de Jesús Vázquez e a súa obsesión cos cambiazos urbanísticos”.

    En materia de cultura, Martiño facía referencia ao Complexo Cultural de San Francisco e o Museo Arqueolóxico, que “seguirá coas portas pechadas despois de dúas décadas en que ningún goberno foi quen de aperturar un equipamento fundamental para a conservación, investigación e promoción do noso patrimonio histórico-artístico”, advertindo tamén do risco de Ourense de perder a partida do 1´5% cultural para a reforma da praza de abastos das Burgas, xa que “os praceiros xa deberían estar reubicados e non temos nin proxecto enriba da mesa pola mala dilixencia deste equipo de desgoberno local”.

Ourense en Común apremia ao goberno a instalar sistemas térmicos de biomasa ao abeiro das axudas do INEGA

Ourense en Común apremia ao goberno a instalar sistemas térmicos de biomasa ao abeiro das axudas do INEGA

•    O prazo para concorrer ás axudas finaliza en quince días.
•    A subvención permitiría dotar térmicamente con enerxías renovables á protectora de animais ou á aula da natureza de Oira.
•    O grupo plantexará tamén esta cuestión como rogo ao alcalde na sesión plenaria do próximo venres.

    Ourense en Común rexistraba esta mañá unha instancia para que o Concello de Ourense concorra ás axudas xestionadas polo Instituto Enerxético de Galicia, para a instalación de equipamentos térmicos de biomasa en edificios municipais, entendéndoo como “unha oportunidade para o compromiso medioambiental, social e económico”.

    Logo de trasladar esta petición ao concelleiro responsable na xunta de área de Infraestruturas, Medio ambiente e Participación do pasado 28 de marzo, o grupo reitera a solicitude, apremiando ao equipo de goberno a concorrer a esta liña de axudas, xa que o prazo remata en quince días.

    Ourense en Común expón no escrito a necesidade de sistemas térmicos efectivos en espazos como a protectora municipal xestionada por PROGAPE, recentemente dotada con xaulas para a hospitalización de animais onde “é evidente a necesidade de manter con calor axeitado a estes animais en estado de recuperación”, ou a aula da natureza de Oira, que “sendo un espazo para a sensibilización ambiental e ecolóxica, aínda conta con radiadores eléctricos como fonte de calor”.

    Este sistema de subvencións contempla un importe para a administración pública local de 1.015.662 euros, cubrindo o 80% dos custes do equipamento térmico, sistemas de almacenamento e sistemas de alimentación, xunto coa montaxe e conexionado,  ascendendo a unha cobertura de ata 200.000€ por proxecto e 1.000.000€ por solicitante.

    O grupo considera que é unha oportunidade aproveitalas, co obxectivo de “fomentar a utilización de fontes de enerxía renovables”, incidindo concretamente nas “vantaxes sociais, ambientais, e económicas da utilización da biomasa forestal con fins enerxéticos”.

    A biomasa é unha enerxía renovable cun reducido impacto ambiental que, polo seu carácter de recurso autóctono, favorece, dentro do campo enerxético, a redución de emisións de CO2, o autoabastecemento e a seguridade da subministración a prezos competitivos.

    A liña de subvencións, publicada no DOG o 22 de marzo, está cofinanciada polo Fondo Europeo de Desenvolvemento Rexional, no marco do programa operativo Feder-Galicia 2014-2020 e xestionadas polo INEGA, dependente da Consellería de Economía, Emprego e Industria.

Ourense en Común critica a visita do embaixador de Israel

Ourense en Común critica a visita do embaixador de Israel

•    Medio centenar de persoas mobilizáronse ás portas do Concello en repulsa á visita de Daniel Kutner.
•    O grupo califica como “desvergoña” que Jesús Vázquez abra as portas do Concello ao representante dun estado racista e represor con todo un pobo.

    Ourense en Común participaba esta tarde na concentración promovida pola plataforma BDS Galiza -Boicot, Desinversión e Sancións- en repulsa á visita do embaixador de Israel ao Concello de Ourense.

    Arredor de media centena de persoas mobilizábanse na Praza Maior ás 17h desta tarde, coincidindo coa recepción de Jesús Vázquez a Daniel Kutner, embaixador de Israel en España e Andorra.

    “Descoñecemos o obxectivo e o motivo para que o alcalde teña a desvergoña de abrir as portas do noso Concello ao representante dun estado racista, que mantén a ocupación, a colonización, o apartheid e que vulnera a legalidade internacional en relación aos dereitos do pobo palestino”, declaraba Martiño X. Vázquez.

OUeC proporá no pleno empregar nomes de mulleres relevantes para renomear algúns espazos anónimos do rueiro do Concello

OUeC proporá no pleno empregar nomes de mulleres relevantes para renomear algúns espazos anónimos do rueiro do Concello

•    Ourense mantén no rueiro nomenclaturas impersoais con números ou letras, como as prazas 100, 200, 500 ou 1000.
•    O grupo suxire a apertura dun proceso de participación veciñal co obxectivo de recoller propostas de mulleres relevantes ás que homenaxear.
•    A moción propón exemplos como o de Asunción González, recoñecida como primeira vítima por violencia machista en Ourense.

    Ourense en Común rexistraba na mañá de onte unha terceira moción de cara ao pleno do próximo venres, na que instará á corporación a renomear as prazas 100, 200, 500 ou 1000 con nomes de mulleres ourensanas relevantes, co fin de saldar unha débeda histórica con moitas mulleres que en Ourense, ao igual que no resto do mundo, foron invisibles a ollos dunha sociedade masculina que limitaba o feminino sempre á esfera do privado.

    Botando man da historia local, o grupo apunta a que “Ourense tivo e ten mulleres dignas de que o seu nome poida humanizar o rueiro de Ourense”, suxerindo como exemplos os nomes da pontina Delia Delso, pola súa labor como mestra represaliada, o de Esperanza Martín Borrajo, polo seu compromiso social como pedánea e activista veciñal, ou o de Asunción González, documentada e recoñecida como a primeira vítima por violencia machista de Ourense.

    Ourense en Común insta nos acordos da moción a abrir un proceso de participación veciñal co obxectivo de recoller propostas, entendendo que “as propias veciñas son as lexitimas propietarias das rúas e prazas”.

    A proposta presentada polo grupo pretende contribuír a socializar a igualdade de xénero e visibilizar a lacra da violencia machista. “Non somos quen de poder devolverlle a vida a ningunha das vítimas pero si podemos xerar un símbolo que permita lembrar cada día a todas esas mulleres sometidas ao longo do tempo á violencia patriarcal”.