Ourense en Común convoca a toda a cidadanía a presentar emendas á  ordenanza municipal sobre tenza de animais potencialmente perigosos

Ourense en Común convoca a toda a cidadanía a presentar emendas á ordenanza municipal sobre tenza de animais potencialmente perigosos

O grupo municipal Ourense en Común abre varios foros de debate en
internet e convoca a todas as persoas interesadas na materia a asistir
a unha xuntanza monográfica o próximo mércores.

A Comisión de Pleno celebrada hoxe no Concello de Ourense abre un
prazo para que os grupos municipais presenten emendas á nova ordenanza 
municipal sobre tenza de animais perigosos do Concello de Ourense 
redactada polo actual equipo de goberno. “Dende Ourense en Común, a 
priori, vemos con bos ollos este tipo de ordenanzas. Con todo debemos 
insistir en que nestas debe primar a socialización e información da 
singularidade deste tipo de animais fronte a sanción”.

“Calquera regulamentación debe estar baseada na realidade social, 
non poden ser inmóbiles senón permeables”, esta é a razón fundamental
pola que dende Ourense en Común pretenden abrir á cidadanía o proceso
de emendas ao texto presentado polo goberno popular. “Estamos perante 
unha ordenanza redactada en 2015 pero construída sobre normas 
obsoletas elaboradas fai máis de dúas décadas”.

Co obxectivo de facilitar o acceso ao texto e facer lexible o mesmo
ás veciñas do municipio, Ourense en Común ten habilitado dous foros de 
debate en internet e recibirá emendas tamén no seu correo-e 
ourenseencomun@ourense.gal. Asemade fai un chamamento público a 
participar na xornada monográfica de debate que se celebrará o próximo 
mércores ás 20h nas Burgas.

O texto resultante, con todas as emendas recollidas, será presentado
por rexistro e integramente en galego. Así é que dende Ourense en
Común afirman estar “moi sorprendidos con que este tipo de documentos 
sexan presentados en castelán obviando a normativa vixente que designa 
o galego como lingua oficial das Entidades locais”.

 

Descarga o texto do borrador da ordenanza en formato pdf

Participa no debate en redes

Ourense en Común proporá en pleno un acordo da corporación para unha segunda exposición pública do PXOM

Ourense en Común proporá en pleno un acordo da corporación para unha segunda exposición pública do PXOM

O grupo municipal Ourense en Común considera que a aprobación do PXOM debe contar coas máximas garantías de transparencia e participación cidadá.

“Estamos perante un documento que marcará o destino de Ourense nas dúas próximas décadas, razón pola que a súa aprobación debe contar co maior consenso social e con todas as garantías posibles”. Con esta afirmación Ourense en Común quere deixar clara a súa posición con respecto aos debates xurdidos nas últimas semanas con motivo da posible anulación do ordenamento provisional: “A urxencia derivada dunha eventual caída do ordenamento provisional non pode servir de pretexto para aprobar un plan sen unha segunda exposición pública”.

Ourense en Común presentará unha moción no pleno ordinario do próximo venres na que demandará un acordo da corporación para garantir que o novo PXOM conte coa maior participación cidadá posible. Entre outras propostas, este grupo solicitará a creación dunha comisión de seguimento ampla, campañas de información específica por barrios e unha segunda exposición pública: “entendemos que despois das 6000 alegacións presentadas o documento resultante non será o mesmo que o exposto inicialmente, polo que é obrigada unha nova fase de alegacións públicas antes da súa aprobación definitiva”.

Avaliación dos 100 primeiros días da nova corporación do Concello de Ourense, diagnose e perspectivas

Avaliación dos 100 primeiros días da nova corporación do Concello de Ourense, diagnose e perspectivas

O grupo municipal Ourense en Común fai balance 100 días despois da súa chegada ao Concello. A pouca permeabilidade desta institución á participación veciñal e as prácticas partidistas que antepoñen intereses electorais aos de Ourense principais eixos da súa análise.

«A inexistencia dun programa de benvida fai que calquera persoa que pretenda traballar polo común se sinta estraña na que debería ser a súa casa». Esta foi a frase pronunciada polo edil de Ourense en Común, Martiño Xosé Vázquez, no primeiro pleno ordinario da nova corporación e segue a ser unha das principais críticas deste grupo municipal, que bota en falta ferramentas e programas para promover a participación veciñal na vida política ourensá.

Os primeiros 100 días do actual equipo de goberno municipal evidencian para Ourense en Común o mantemento de vellas formas de facer política que sitúan a Ourense na cola da renovación democrática xurdida no estado español como consecuencia das eleccións municipais do 24 de maio. «O feito de que teñamos o alcalde mellor pagado de Galicia na provincia cos salarios máis baixos é a proba de que este cambio aínda non chegou a Ourense» apúntase desde Ourense en Común.

Sobre as afirmacións do alcalde Xesús Vázquez apelando a unha “política de man tendida”, Ourense en Común amosa as súas discrepancias. «As formas e intereses do actual equipo de goberno quedaron en evidencia cando promoveron sen consenso unha modificación de crédito que mantiña as prioridades de gasto lonxe da xente do común». O que vemos en OUeC é que «entre o anterior goberno do PSdeG e o actual do PP gastarán neste ano 2015 case un millón de euros en propaganda institucional», o que nos fai ser moi críticos coa posibilidade de que se estean empregando «cartos públicos con intereses partidistas en ano electoral».

  • Audio da Rolda de Prensa na que se expón o que foron para OUeC estes primeiros 100 días no Concello: http://ourenseencomun.gal/avaliacion-100-primeiros-dias
  • Vídeo no que o voceiro de OUeC no Grupo Municipal, Martiño X. Vázquez, analiza o que foron estes 100 primeiros días no Concello:

Ourense en Común urxe a Jesús Vázquez e ao equipo de goberno a constituír a Mesa de Traballo Municipal de Mobilidade

Ourense en Común urxe a Jesús Vázquez e ao equipo de goberno a constituír a Mesa de Traballo Municipal de Mobilidade

O grupo municipalista presentaba esta mañá por rexistro unha instancia para a súa convocatoria con carácter de urxencia ante a celebración da Semana Europea da Mobilidade

Ourense en Común presentou no pleno do mes de Agosto unha moción que foi aprobada pola actual corporación para constituír unha Mesa de Traballo Municipal de Mobilidade. Perante a inactividade do equipo de goberno a este respecto nese mes a organización municipalista tornaba novamente a solicitar a súa convocatoria urxente no pleno do mes de Setembro. Unha urxencia derivada da inminente celebración da Semana da Mobilidade Europea.

Dende este mércores 16 e ata o próximo martes 22 celébrase en toda Europa a Semana da Mobilidade. Unha campaña de concienciación dirixida a sensibilizar, tanto aos responsables políticos como á cidadanía en xeral, sobre as consecuencias negativas que ten o uso irracional do coche nas cidades, tanto para a saúde pública como para o medio ambiente, e os beneficios do uso de modos de transporte máis sustentables como o transporte público, a bicicleta ou o desprazamento a pé.

A día de hoxe luns, só dous días antes do inicio desta Semana da Mobilidade Europea, nin o Grupo Municipal de Ourense en Común nin o resto de grupos e colectivos sociais relacionados con esta materia foron convocados á constitución da citada Mesa de Traballo Municipal de Mobilidade. Feito que dende Ourense en Común entenden como «a evidencia do pouco interese que o actual equipo de goberno ten polo noso medio ambiente e saúde pública». Asemade argumentan que «a desidia nesta convocatoria e a supresión no organigrama popular de calquera referencia ao termo mobilidade, sumada ao retraso e escurantismo co que está sendo afrontada a renovación do contrato coa empresa de transporte público, son a proba de que esta temática esencial na construción das cidades do futuro non é unha prioridade para este equipo de goberno».

Xornada de Feminismo e Diversidade do pasado 5 de setembro

Xornada de Feminismo e Diversidade do pasado 5 de setembro

Ledicia Piñeiro nos resume o máis destacado deste encontro sobre políticas de igualdade desde unha óptica feminista

Dicía Beatriz Preciado que é esencial facer unha «xenealoxía política do corpo» que nos permite coñecer e comprender cales e como foron aqueles procesos de «ficción política» -identidade sexual, xénero, clase social, raza …- que nos moldean e constitúen. Ficcións que son somáticas (é dicir, «toman a forma da vida») e que nalgúns casos pode ser deconstruída e reconstruída a través de varias estratexias de resistencia e subversión crítica (para que en lugar de someternos, nos empoderen).

Desta «xenealoxía política do corpo» hai moito do modelo organizativo das feministas de Podemos. Feminismo e Diversidade, lila son as lesbianas, as trans, as negras, as persoas con movilidade reducida, os gays… os corpos vulnerables, os corpos anormais, os corpos infradotados…

O pasado sábado 5 de setembro tiven a sorte de participar nas xornadas de feminismo e diversidade organizadas pola secretaría de Feminismo e Coordinación de Podemos Galiza. O día de traballo dividiuse en tres apartados. Na primeira parte tivemos un momento de reflexión sobre o por que da baixa participación das mulleres na política, e por extensión en case calquera espazo do ámbito público. A división do traballo, contexto hostil, anos e anos de desterro de calquera espazo público, chegaron a ser parte das conlusións da xornada. ¿Cómo se muda? xerando referentes, reivindicando os nosos métodos e a nosa política, facendo do feminismo parte esencial da axenda política, estando nós e chamando a outras.

Na segunda parte da xornada falamos da organización feminista dentro de Podemos, estructura organizativa, liñas, debates (abertos e pechados), tarefas inmediatas… Hai unha grande experiencia, xerada en pouco tempo polas compas de Podemos, materializada en textos, accións e creación de estructura. Finalmente, tres compañeiras de procesos municipalistas de unidade popular en tres concellos diferentes dimos a nosa visión da participación da muller na institución e de como ser suxeitos activos no ostracismo dunha institución patriarcal que constantemente xera situacións perversas contra as mulleres.

Sentímonos seguras para concluír que nos tempos que vivimos, a confluencia que está por vir debe, necesariamente, ser feminista, e só será feminista coas mulleres na primeira liña, construíndo e dirixindo procesos.

Resumo do 1º Encontro de Forzas Emerxentes da provincia

Resumo do 1º Encontro de Forzas Emerxentes da provincia

O pasado sábado 5 de setembro OUeC participou no I Encontro de Forzas Emerxentes xunto con persoas integrantes de candidaturas municipalistas da xeografía ourensá.

O encontro tivo por obxecto establecer un primeiro contacto e desenvolveuse nun clima de diálogo e entendemento entre as asistentes. Nun tono cordial debateuse, sen orde do día previa, de forma aberta de numerosas cuestións: unha a unha cada representante compartiu diagnose da realidade do seu concello e, cos matices propios de cada realidade local, púidose constatar que os retos son semellantes.

A xornada rematou co acordo entre os presentes dunha nova convocatoria para o vindeiro sábado 26 de setembro no concello de Sandiás onde se dará continuidade ao debate xerado así como se concretarán métodos de colaboración intermunicipal.

Foto do I Encontro de Forzas Emerxentes da provincia de Ourense

Reunión cos Delegados Sindicais da Policía Local de Ourense (01/09/2015)

Reunión cos Delegados Sindicais da Policía Local de Ourense (01/09/2015)

1 de setembro de 2015 ás 17h.
LUGAR: Local de Ourense en Común (As Burgas)
ASISTEN: integrantes dos grupo de traballo Institucional de Ourense en Común, representantes sindicais.

RELATORIO:

Nesta terceira reunión comezamos falando sobre mobilidade e a proposta de Ourense en Común aprobada en pleno para implementar a Mesa de Mobilidade. No pleno ordinario deste venres rogaremos a convocatoria urxente na que a Policía Local debe estar presente. Ponse en coñecemento a moción presentada no pleno do 30/07/2015: Andar a cidade pensando na infancia.

Seguimos avanzando e abordamos a necesidade ou non de redactar un Regulamento específico de organización e funcionamento do Corpo de Policía Local do Concello de Ourense. Preséntase unha proposta de borrador e os representantes sindicais afirman que é o único modo de xestionar de modo eficiente este servizo. Cando existe unhas normas de xogo impera o xogo limpo en base as regras.

A moción que vai presentar no Pleno o grupo municipal Democracia Ourensana para implementar este regulamento, baseándose nesa proposta de borrador, pode ser beneficiosa neste senso. No referido ao marco temporal semella un tanto limitado pero se existe vontade política de todos os grupos pode ser factible. É necesario lembrar que estamos nun goberno en minoría e a aprobación dun documento estratéxico no contexto actual permitiría que a súa permanencia no tempo estivera garantida.

A redacción do Regulamento non exime do seu incumprimento, caso do Regulamento de Participación Cidadá ou tantos outros. Así é que entendemos necesario a proposta pero tamén a aplicación.

No referido á proposta dos membros da Mesa de Negociación que terán a encomenda de redacción, esta debe ser o máis multivocal e plural posible: presenza da Xefatura do Corpo, os diferentes sindicatos da Policía Local e os diferentes grupos municipais. Incluso con calquera outra presenza social sempre que sexa posible en aras da participación, pero garantindo a operatividade do proceso.

Complementariamente a esta actuación é necesario repensar a RPT e redactar un organigrama lóxico para o Concello de Ourense. Trátase dunha actuación realmente prioritaria, para a que se debe ter en conta quen serán as persoas responsables de desenvolvela e se teñen capacidade para tal.

Outros temas en conversa:

  • Novamente faise un chamamento da deficitaria situación da Policía Local para afrontar a cantidade inxente de peticións e servizos: medición de ruídos, tráfico, terrazas…
  • Xestión e necesario seguimento de autos, sancións, etc.
  • Necesidade de formación permanente e actualización do persoal: medicións, instrumental…
  • Nova concesión ORA e grúa municipal. Expira o contrato o próximo mes de Abril de 2016.
  • Memoria anual e informe de actividades da Policía Local.
  • Medios infrautilizados e outros deficientes (parque móbil, equipos de protección individual…)

Agradecendo ambas partes a disposición mostrada e emprazándonos para futuras encomendas, nomeadamente mesa mobilidade e tramitación peticións específicas, levántase o encontro.

Mocións de OUeC para o Pleno Ordinario 04/09/2015

Dereitos laborais, transparencia e participación na xestión municipal serán as tres mocións que Ourense en Común presentará no pleno ordinario deste Ligazón ao evento na axenda de OUeC

Moción do Grupo Municipal OUeC: Conflicto no Servizo de Axuda no Fogar

A organización municipalista Ourense en Común considera que unha mala xestión na adxudicación do contrato de axuda a domicilio está a provocar deficiencias neste servizo público. Razón pola que solicita a creación dunha comisión para revisar todos os contratos do Concello de Ourense coa empresa adxudicataria Limpiezas, Ajardinamientos y Servicios Seralia, S.A. Preténdese garantir tanto a calidade na prestación do servizo como blindar os dereitos das traballadoras ameazadas por un expediente de regulación de emprego desestimado polas autoridades laborais competentes.

+ Máis información sobre este tema no resumo da xuntanza mantida entre Ourense en Común e persoal da empresa Seralia o 9 de xullo.

+ O texto íntegro desta Moción de OUeC en PDF: Moción Pleno Ordinario 04092015: Seralia

 

Moción do Grupo Municipal OUeC: Banda de Música, xestión democrática

A Banda de Música Municipal será novamente tema de debate. Deste modo Ourense en Común cumpre coa promesa feita no anterior pleno de presentar unha proposta para obxectivar o seu labor e poñer fin dunha vez por todas á súa instrumentalización política. Así é que se preténde crear unha mesa de traballo con representación de todos os grupos municipais, aberta á participación cidadá e na que estará representada tamén a Asociación Ricardo Courtier. O obxectivo é constituír un órgano democrático con representación das forzas políticas representadas no concello, así como da sociedade civil, coa finalidade de procurar a máxima eficiencia no gasto público e a implantación de mecanismos de transparencia na xestión da Banda Municipal.

+ O texto íntegro desta Moción de OUeC en PDF: Moción Pleno Ordinario 04092015: Banda de Música

 

Moción do Grupo Municipal OUeC: Participar e ser partícipes

A terceira das mocións presentadas por Ourense en Común, baixo o título Participar e ser partícipes, pretende promover a constitución dun Consello Cidadán de Participación con representación de todos os grupos municipais, técnicos e colectivos sociais para, entre outras, a revisión, actualización e aplicación do Regulamento de Participación Cidadá do Concello de Ourense. Principal obxectivo: poñer solución ás serias deficiencias na aplicación deste texto e garantir a participación real da cidadanía na xestión municipal para que nunca máis ningún cidadán, colectivo ou asociación vexa privada a súa participación nun órgano de goberno local.

+ O texto íntegro desta Moción de OUeC en PDF: Moción Pleno Ordinario 04092015: Consello Participación